修哥紅館開騷刷新年紀紀錄 學友家輝同台獻唱賀契爺

年屆90歲嘅修哥胡楓，原定中秋節舉行嘅演唱會因為佢喺開騷前確診而延期，最後表演改為喺11月12號舉行，修哥同大班嘉賓老友表演前仲齊齊上香祈求順利演出呀。

再次刷新自己最年長紅館個唱表演者紀錄嘅修哥，仲喺大班朋友到場支持之下，以一身桃紅西裝現身舞台表演添。

除咗台下如雷掌聲之外，到場擔任嘉賓嘅契仔女同好朋友一樣星光熠熠，其中歌神 張學友 同影帝 張家輝 ［兩兄弟］就齊齊上台同修哥合唱，學友更加喺台上向契爺行跪拜禮祝賀，學友仲提議契爺年年辦個唱，自己仲會投資做埋主辦咁話呀。

唔少後輩都自動請纓支持話做嘉賓，而修哥嘅孫同曾孫等都有上台齊齊合唱，難怪修哥話自己感動又感恩呀。

刷新自己紀錄嘅修哥仲話，自己冇退休打算，更話希望有機會再次打破自己嘅紀錄咁講呀。