樂隊 Zpecial今年新加入華納，推出新歌《Not the One (Neither of Us)》，是次華納搵嚟林千渟及微辣佩男兩位女主角參與MV演出，與主音康聰及鼓手煒賢演對手戲，第一次要演戲，康聰緊張到爆汗，煒賢自爆：「藉呢首歌向曾經被我傷害過的女孩子，講聲唔好意思。」
康聰表示呢首歌係講述一個感情上，不斷巡環傷害嘅故事，佢第一次做男主角，一次過同兩個女仔演戲，非常緊張，彼此有不少親蜜動作，最後落得被佩男取笑下場 ，佩男踢爆康聰有一場戲，拍嗰陣好搞笑，康聰大汗到整到佩男塊面濕晒，成面都係康聰啲汗，康聰尷尬笑道：「係呀，唔好意思，攬頭攬頸之後，我發覺自己唔單止係手出汗，手臂都出埋汗，攬過佢去到就搞到佢面都濕埋。」煒賢馬上反問：「真係好怪呀！我識咗佢咁多年，佢係一個連做運動都唔流汗嘅人，但係今次竟然咁囉。」
煒賢同樣係首次拍MV演戲，但佢冇康聰咁有福份可以跟靚女攬頭攬頸，佢要同林千渟吵大鑊，煒賢笑言：「我都流晒汗，我第一次要喺中環條街同條女吵大鑊，拍嗌交戲，互爆咗十幾次導演先收貨。好多謝千渟，佢帶我入戲，好彩我個樣夠衰夠惡，導演都收貨。」問到煒賢嘅情路史，有冇傷害過其他人，煒賢坦白承認：「點會冇，我喺呢度藉呢首歌向曾經被我傷害過嘅女仔，講聲唔好意思。」康聰覺得傷害係人生一個成長過程，人就會成長，日後會處理得更好。
而千渟就話被傷害係人生之中，總要經歷，以前細個會想報仇，但現在人成熟咗，就覺得報仇冇意思，反而自己更累！
