監製文偉鴻（Jazz）過往作品由《使徒行者》至《鐵拳英雄》均掀起「全城競猜熱」，今次TVB 55周年台慶劇《超能使者》亦唔例外，劇集仲有14集先大結局，網民對於Final Boss已有唔同揣測，除咗反派角色魚蛋仔（唐嘉麟飾演）及韋瑞琦（王君馨飾）成最大嫌疑人外，身份成謎嘅袁叔（張國強飾）、貪錢阿鏈（陳展鵬飾）、威仔（沈震軒飾）等亦被指極具「變節」潛質，有網民估計Final Boss可能尚未現身 !?
近日討論度較高嘅「嫌疑人物」就係阿鏈老婆淑敏（劉佩玥飾演）莫屬，質疑佢對阿鏈與Q姨（唐詩詠飾演）出雙入對「零呷醋」，認為對阿鏈冇「性」趣嘅佢忽然懷孕相當有可疑，網民推測淑敏個BB唔係阿鏈嘅，有傳淑敏同阿鏈婚姻凍過水，日前劉佩玥接受《東張西望》訪問，爆料指嚟緊仲大鑊過離婚，令期待指數倍升，而噚晚嗰集已講到淑敏剛宣佈懷孕，因不滿阿鏈一再動用「生B基金」讓叔仔鍾孝添（黃庭鋒飾演）還債，抑壓多時嘅淑敏將憤然離家。
據知劉佩玥飾演嘅淑敏，接下來將180度性情大變，更會紅杏出牆？！全新《超能使者》預告片先係講淑敏淡淡然對阿鏈說：「離婚啦，我哋冇彎轉。」阿鏈則苦苦哀求：「對唔住，我真係唔知我原來咁多嘢做得唔好，畀次機會我，我哋可以返轉頭，唔好離開我啦老婆。」語畢兩人相擁哭成淚人。
豈料尾段卻突然「筆風急轉」，穿上性感睡衣嘅淑敏疑似遭捉姦在床，大受打擊嘅阿鏈更係一手叉頸、一手擸刀，惟淑敏全程竟面無懼色，離奇地展露出魅惑感十足嘅神秘眼神；同一時間，Q姨則因發現驚天大秘密而與阿鏈齊齊深陷險境。
問到淑敏到底隱藏咩秘密？監製Jazz大賣關子：「只能夠講淑敏絕對係關鍵人物，嚟緊仲會有『超能使者』死，相信觀眾一定會意想不到。」而一切謎團將喺本周逐步揭開，另外今晚阿鏈與高氏兄弟（陳山聰、林子善飾）為氹富婆（樊亦敏飾）開心，將不惜犧牲色相晒肌，仲慘變「孖潤腸」，相當爆笑！
無綫55周年台慶劇《超能使者》逢周一至周五晚9點半翡翠台播映