思家大戰︱炎明熹火星人上身Carry全隊 張國強率「430穿梭機」40周年Re-U

由李思捷主持及監製嘅《思家大戰》本周日晚上九點半播映第二季終極篇，適逢今年係兒童節目《430穿梭機》40周年，節目邀來歷代兒童節目主持人合體，強攻觀眾集體回憶，更請來一班小妹妹表演跳舞，氣氛熱鬧。

是集嘉賓陣容有張國強率領嘅「430穿梭機」隊、成員譚玉瑛、黎芷珊、伍文生及關宛珊，與Gigi炎明熹率領嘅「After Class」隊，成員Chantel姚焯菲、Yumi鍾柔美、Windy詹天文及Johnny Yim對決。

有「火星女神」之稱嘅Gigi大晒無厘頭本色，介紹隊員時特別為各人起咗「花朵」，分別係小可愛精Chantel、小迷人精Yumi及小高音精Windy，最後更封Johnny Yim係「父」心漢，Gigi解釋：「佢係有一個父親心腸嘅漢子！」認真妙想天開，思捷擅長扮嘢見稱，更模仿Gi式腔說話，場面搞笑。

去到問答環節，繼續「火星人」上身嘅Gigi因為怕醜，竟一輪嘴以超長句子形容「瀨屎瀨尿」，Cute爆表現贏得全場掌聲，Gigi係隊中靈魂人物，雖然睇落咩都慢三拍，但佢非常醒目地兩度執雞成功，交出MVP級表現。

至於「430穿梭機」隊雖然開頭表現麻麻，但後來居上與「After Class」隊鬥到即時死亡環節，戰況緊張刺激，想知道最終大贏家誰屬？密切留意本周日晚《思家大戰》第二季終極篇。

《思家大戰》第二季終極篇本周日晚九點半翡翠台播映