TVB 55周年台慶主題曲《攜手創無限》動用全台藝員參與，由樂壇前輩飽比達擔任台慶主題曲監製，呢日有譚俊彥、陳山聰、羅天宇、吳偉豪、何廣沛、陳敏之、謝東閔、丁子朗及孔德賢，分別現身錄音室為台慶55周年錄歌。
譚俊彥稱由於愛女譚晴（Renee）近日開始學鋼琴，令譚俊彥趁機重拾樂理知識，佢笑言亂彈咗廿年；而歌手出身嘅陳山聰，就好想錄一首新歌回饋一直支持佢嘅fans，佢爆兒子陳霆軒（Jaco）經常玩玩具結他，玩嗰陣好有音樂天份，豹哥單立文更有意親自教授。
羅天宇、吳偉豪同何廣沛笑談呢次合唱有技巧，不時互相望住對方個嘴，羅天宇就覺得有啲尷尬；陳敏之與謝東閔錄歌前先買外賣，自認難擋美食誘惑，唱歌經驗尚淺嘅丁子朗及孔德賢非常感謝前輩飽比達包容，讚前輩完全冇脾氣，不時指導佢哋每一個音，又陪佢哋試唱。
