「夢工場」無敵貓劍俠早喺2004年出現於《史力加2》一炮而紅，其後再參演多兩部史力加作品搶盡鋒頭，最終坐正孭飛《無敵貓劍俠》大電影，廣受歡迎，兩大系列全球累積票房高達35億美元，揭開荷里活動畫史上最輝煌一頁。
18年來，呢個熱愛冒險膽生毛嘅皮靴貓角色，一直人氣高企，喺全新大電影《無敵貓劍俠：8+1條命》(Puss In Boots: The Last Wish) chok爆回歸，將於2022年12月22日上映，今集粵語版搵嚟衛蘭（Jancie）、張天賦（MC）、馮允謙（Jay）、湯令山（Gareth.T）聯手聲演，同無敵貓劍俠來一次玩命演出。
皮靴貓知道自己9條命死剩1條之後，必須放下身段請求勁敵綿掌貓女俠幫助，先有機會改寫命運，實現最後願望，佢哋連同口水多過茶嘅治療犬，一起踏上非一般征途；喺金髮姑娘（衛蘭 聲演）、三隻熊犯罪家族（張天賦 聲演熊寶寶）、賞金獵人大壞狼瘋狂狙擊下，及時前往黑森林尋找傳說中嘅許願星，途中遇上醫生（馮允謙 聲演）、道德蟲（湯令山 聲演）等，替皮靴貓重拾失去嘅8條命。
