有「全才花旦」之稱嘅燕姐 尹飛燕 早前接受香港電台《舊日的足跡》節目訪問，除咗感激媽媽協助鋪路加入戲行闖出好成績之外，佢又罕有憶述多年前嘅婚姻失敗，仲有目前嘅快樂人生。
燕姐早喺1962年已踏台板演出折子戲《昭君出塞》，到今年已經一甲子。上月燕姐就獲香港演藝學院頒授榮譽院士表彰，呢次殊榮亦令佢回想對粵劇投入興趣嘅開端：「真係估唔到，我只讀過一年書，竟然可以獲得榮譽院士。我11歲時喺紅磡差館幫媽媽同警察洗軍裝制服，一位警察太太兼著名歌伶 何飛霞 鼓勵我學唱戲。但係媽媽嘅朋友就話:『畀個女去學戲有乜鬼用呀，佢又唔出聲，學唔掂，不如叫佢去捧點心，我哋都有籠蝦餃燒賣食同有杯茶飲吖。』好彩有好多好師傅教我。當時60年代，媽媽仲買咗一部貴價錄音機。我感激佢為我鋪咗一條好嘅路。而家我獲頒院士就想第一時間同佢講：『你唔使擔心，而家有好多人爭住斟茶畀你飲!』」
雖然燕姐係「全才花旦」，不過佢喺前夫阮兆輝口中就係默片明星，燕姐話：「我好少講嘢，因為主要都係由佢講。」憶述當年阮兆輝提出分手，燕姐為照顧子女同演戲，未多加理會。後來生活唔開心，戲班班主叫佢集中精神工作，好好照顧子女，唔好諗咁多。
「我有個好處，『天跌落嚟當被冚』，多少愁恨第二日就當冇事。當年媽媽去世又遇上離婚，有人怕我會自殺，但我可以捱過去，因為我相信天無絕人之路。」燕姐話最初同前夫再見不是朋友，後來諗通咗，覺得對方都算係一個好人。「現在佢嘅太太『搞班』我都有參與。其實我已經原諒佢，唔係點會同佢合作做戲？(離婚後)半年已經放低咗，我都覺得好快。」
燕姐說當年自己從未有過追求第二春嘅諗法，因為怕會再次受傷。身為單親媽媽嘅燕姐亦完全唔覺得辛苦，仲感恩千金為咗她每年可以節省10萬元學費放棄到英國讀書，改去加拿大。兒子 阮德鏘 亦有出國升學，不過更多時間跟爸爸學戲。「初時我會偷偷去睇佢由低做起。知道行內規矩好重要，我覺得佢適合呢一行，因為佢『轉數快』，所以我支持佢做文武生。而家佢又做埋我嘅經理人，為我分擔工作，我好開心。」
燕姐踏台板做戲是轉眼60載都未言休，佢非常感激媽媽同戲班嘅兄弟姊妹：「原來人生有好多嘢可以去學，學到做到就一定會有回報。11月16號我就踏入74 歲，好慶幸呢個年紀依然腰板畢直。我最近認識咗一班新朋友，有發哥周潤發、黃日華、司棋姐，每朝相約去跑步。發哥教我點樣呼吸，甚至會幫大家按摩肩膊，佢真係好好。」
弄孫為樂亦成為燕姐嘅重要活動：「曾經有人話我唔笑個樣好惡。記得有一次同林建岳見白龍王，佢第一句說話就叫我唔好抑鬱同執著，要開心寬容一啲。我而家最開心嘅係『湊孫』，(孫女)「灰鼠B」好鍾意睇大戲，仲鍾意跟我哋一齊謝幕。有一次我唔記得帶佢出台，佢竟然話說:『嫲嫲你做乜唔拖我出去?我遞定手仔㗎喇』。」
