Gareth.T湯令山一連三場《November Rain 2022》演唱會於18號舉行，唔少圈中人都有到場支持，好似張繼聰與老婆謝安琪、林家謙、Serrini，林海鋒，陳蕾、MC $oho & KidNey、岑寧兒、王丹妮、Locker林家熙與女友吳家忻Kayan9896、少爺占、吳林峰等。
演唱會以Gareth嘅睡房做佈置，甫開場佢背向台下自彈自唱《dinner in bed》之後，就對台下眾人講呢場演唱會係無坐位，所以觀眾們都即刻企哂起身。首場嘉賓有Tyson Yoshi，佢哋合唱完《Something》之後，Gareth話Tyson係佢返嚟香港做音樂之後，認識嘅頭幾個朋友，Gareth話所以按照呢個認識嘅時順序，Tyson係需要一早出場。唔少人都知Tyson勁錫女友Christy，仲錫到寫咗首歌送畀對方，點知呢晚Gareth就似乎想爆料，叫Tyson分享下當年點寫《Something 》，不以為然嘅Tyson笑言：「首歌…係講一個我以前鐘意嘅女仔，不過依家唔鐘意喇，哈哈。所以我將第一段改咗做寫比Christy…」
而第二場就有Janice衛蘭同Jill衛詩擔任嘉賓，Gareth介紹 Janice時，就言自己喺華納除咗女友moon之外，對方就係佢最鍾意嘅歌手，又話想喺演唱會上自肥聽Janice唱《At Your Best》同《Peaches》。每晚Gareth都會為嘉賓準備禮物，呢晚佢就準備咗地毯同Cap帽送畀Janice同Jill，當佢兩個收到後就諗住送個Big Kiss做點禮，點知Gareth即刻啟動禮貌Mode刹停二人，仲笑謂真正嘅kiss要留返畀女友阿Moon呀。第二場嘅嘉賓仲有《笑住喊》MV嘅女主角Day許軼，Gareth喺台上問到Day拍MV嗰陣畀啲鼻涕飛去佢嗰度時有咩感覺?Day就話好彩當時啲鼻涕係飛落佢件衫而唔係面度。
Gareth首《勁浪漫超溫馨》唱到街知巷聞，當中有一句歌詞係「銀行存款等如零」，Gareth喺台上話好諷刺嘅係，佢唱完呢首歌銀行戶口就多咗幾個零，之後仲喺場內大噴印「Gareth幣」，搞到全場觀眾狂搶錢。至於encore位，Gareth話好多人都話佢淨係唱R&B，所以今次個騷佢唱咗好多唔同風格嘅歌，仲話希望大家以後稱呼佢做一個Artist呀。
