欣宜現身聖誕亮燈儀式 周勵淇或與陳曉東方力申演出

鄭欣宜、周勵淇及鋼琴家牛牛等日前出席聖誕亮燈儀式，講到聖誕節嘅安排，欣宜話自己會喺工作中渡過，仲話自己嘅Schedule已經排滿工作，覺得非常之充實，不過唯一失望嘅係，連同朋友交換禮物慶祝嘅時間都冇呀。

對於嚟緊各個音樂頒獎禮，欣宜就自嘲係有妄想症程度嘅信心，仲搞笑話即使他日自己已經退休，都仲會好有信心覺得自己可以攞獎呀。講到好姐妹林欣彤近日回復單身，欣宜話有以短訊問候對方，又指林欣彤係個好叻女仔，畀啲時間佢就會OK。

早前周勵淇同方力申為陳曉東擔任演唱會嘉賓，勾起觀眾唔少回憶，呢晚周勵淇就話估唔到觀眾嘅反應會咁大，佢又透露有唔同嘅單位都聯絡緊佢哋，想睇下呢個組合會唔會可以有啲後續嘅事情發生。周勵淇又話因為自己都有一段時間冇唱歌，所以嗰次做完嘉賓之後，都令佢嘅歌癮出返嚟，所以都研究緊出年會唔會有啲新計劃見大家。至於講到近日嘅工作，啱啱拍完電影嘅周勵淇表示而家正處於休息狀態，亦有睇緊一啲劇本，佢指明年將會再開拍另一齣電影，但最主力嘅工作都係照顧小朋友呀！