金馬59丨黃秋生封金馬影帝影后 張艾嘉哽咽擔心電影被取代

第59屆台灣金馬獎賽果於19號晚出爐，黃秋生、張艾嘉成出鮮爐影帝影后，而多齣香港電影亦喺金馬獎上得到好成績。

憑港產片《燈火闌珊》摘得影后嘅張姐，係相隔36年再奪金馬影后殊榮，張姐喺台上發表感言嗰陣，就話霓虹燈曾經係香港最燦爛最燦爛嘅一個標誌，但可惜已經被LED取代，令佢心裏覺得好感嘆，好怕電影會被小螢幕取代，佢哽咽咁話希望電影可以永遠存在，同時又多謝導演同一眾台前幕後嘅工作人員。張姐表示希望將呢個獎獻畀佢95歲嘅媽媽，佢話媽媽年青嘅時候曾經有一個演員夢，但因為當年嘅環境唔容許而被逼放棄，而媽媽就將呢份「工作」留咗畀自己，令張姐非常感謝媽媽呀。

呢晚金馬獎紅地毯發生咗件小插曲，有指張姐佩戴嘅藍寶石頸鏈跌咗一粒石，搞到要喺紅地毯進行搜索，不過張紅好快就澄清其實粒石係佢自己拎落嚟而唔係跌咗，而事後張姐接受訪問，就話好開心可以同一班年輕人一齊返到金馬獎呢個舞台。

而憑電影《白日青春》首次封金馬影帝嘅秋生，領獎嘅時候就拖實巴基斯坦裔童星林諾一齊上台，仲將個獎畀對方拎住，又鼓勵激動到喊嘅林諾同大家打招呼。當講到得獎感言嗰陣，秋生表示自己等咗呢個金馬男主角獎等咗好多年，佢話最想話畀媽媽知佢終於得到喇，但可惜嘅係秋生媽已經不在人世，然後佢對住仲喊緊嘅林諾問：「我們一起哭好嗎？」

今次秋生得獎係由17位評審一致通過，當佢知道呢知消息時即謙虛咁話唔敢講係實至名歸，自己只係好運氣，佢又好感謝一眾評審嘅厚愛。秋生又話而家好多新導演都好有創意，所以相信以後佢哋會創作出更加多好劇本好電影。

至於早前求婚成功嘅周興哲，就憑《想知道你在想什麼》奪得最佳原創電影歌曲，佢話自己都覺得好神奇，而未婚妻亦有即時送上祝賀，問到佢會唔會買啲咩嚟獎勵自己？周興哲就話因為要儲錢買樓，所以而家要慳錢呀！