《仁濟心》短劇分享弱勢抗難關 真人真事改編堅毅精神

曾監製《香港愛情故事》同《青春不要臉》等劇集嘅林肯,以「抗疫福袋製作小組」日常為故事基礎,製作五集新短劇《仁濟心》,透過五個真實個案帶出「殘而不廢」同「愛可以超越血緣」等正面訊息。

《仁濟心》演員陣容包括 袁偉豪 蔣家旻 錢嘉樂 韓馬利 文雪兒 吳家樂 寶珮如 董敬文 李紹堅 同 譚永浩 等。另外仲有金像影后級人馬 鮑起靜 現身劇集尾段嘅小分享環節,同仁濟醫院董事局葉恭正主席,一齊剖析每集個案背後嘅意義。

首集小分享重點係「只要永不言敗,任何人都可走出自己嘅道路」,故事真實人物原型係小兒麻痺症患者慧嫻,喺工場負責製作車縫布藝品工作嘅佢,由寶珮如飾演。由於慧嫻年紀小小就有身體缺憾、仲曾一度被診斷有抑鬱,不過家人未有以特殊眼光看待,亦照樣安排佢分擔家務,形成慧嫻樂觀積極同獨立性格。

最終慧嫻機緣巧合下加入庇護工場工作,仲將布藝功夫傳授俾經常闖禍嘅實習社工檸樂(李紹堅 飾),製作組透過相關過程,帶出唔少正向訊息同觀念:「唔好問『點解係我』,要問『點解唔係我』,咁樣可能會發現自己原來都可以勝任件事。」

首演小兒麻痺縫紉達人的寶珮如,劇中唔止縫紉功夫似模似樣,亦演活不屈不撓、自力更生嘅殘障人士。佢受訪時笑指自己縫紉零經驗,開拍前做足唔少準備功夫:「主要喺網上做功課同資料搜集,同埋多謝導演拍到我好勁咁。」

由於角色以電動輪椅代步, 對從未接觸過嘅佢嚟講亦係一大考驗。仲一早喺電視城「試車」,但係到開拍當日依然被考起:「第一場戲就要坐電動輪椅過馬路, 我真係好驚!一來仲未好熟習性能,二來因為劇本話我用咗好耐,咁我拍嘅時候就唔可以太驚青,同埋唔可以時慢時快,所以好擔心,好彩最後有驚無險地收工。」

佢又話經過今次拍攝,更深切體會傷殘人士嘅堅毅精神:「佢哋好叻,好似慧嫻咁,佢唔單止冇放棄,仲好努力行每一步,冇放棄每一個機會,先至有今日嘅成績。」原型人物慧嫻開創了屬於自己嘅「布藝天堂」之餘,更創造咗「愛樂熊」進一步傳揚愛的訊息,慧嫻話:「呢個熊仔手腳係郁得,因為我行唔到去同人講點樣畀愛人,佢可以代表我四圍 去送愛。我想鼓勵傷殘人士,真係可以出番去做嘢。」 

五集短劇《仁濟心》,11月26號起 星期六晚22:45 翡翠台

 相關推薦