欣宜新歌MV挑戰演技 盼大家學識面對與克服恐懼

香港女歌手Joyce鄭欣宜最新派台歌《恐懼蠶食心靈》近日上架,而為配合歌曲內容,MV就要欣宜挑戰佢最大嘅恐懼–演戲,欣宜表示:「我好鍾意新歌《恐懼蠶食心靈》,因為當中探討嘅問題,正正係我人生之中不斷面對嘅問題。可能大家都覺得鄭欣宜好有自信,好知道自己想做乜嘢嘅人,係嘅,但去搵到想做乜嘢或者自信之前,其實不斷有好多問題去問自己,呢啲問題係會產生恐懼。」佢又話首歌嘅歌詞同MV想表達,就係大家感到恐懼係好正常,最緊要係知道恐懼緊啲咩,要去正視、面對同剋服佢。

自言最大恐懼係演戲嘅欣宜,對於今次喺MV入面有多場內心戲,佢直言係個極大嘅挑戰:「拍呢個MV好辛苦,要用好多情緒。最艱難係全日拍攝嘅第一個鏡頭,故事講我目擊愛人發生意外,導演拍攝我嘅大頭,好難演,因為係虚擬,我係靠幻想去演戲,而我最大恐懼就係演戲!」欣宜指今次個MV對佢自己嚟講係一個好好嘅提醒,提醒佢有好多事係要去面對,再從中得到進步。欣宜仲透露MV入面有彩蛋:「其實我喺今次MV放咗好多我嘅小秘密,睇吓我嘅JoyStick們夠唔夠眼利搵得出。」

 相關推薦