張蔓莎東京拍新歌MV 沉淪舊戀事失落沮喪

唱作新人 張蔓莎 今年正式進軍樂壇,以創作歌手身份,親自作曲聯同鍾說填詞嘅首支個人單曲《剎那的》,一推出就打入唔同電台嘅歌曲榜前列位置。之後再推出嘅《到時見》同《未算壞》同樣成績驕人。而Sabrina第4首最新歌曲《自生自滅》,今晚上架,MV早前仲到日本東京取景拍攝。

《自生自滅》係Sabrina第一首描寫失戀嘅歌曲,MV有別之前3首歌嘅虛擬空間回到現實世界,更於港人久別的東京獨自失落溜躂,MV中嘅Sabrina吃着甜點麻醉失戀痛苦,Sabrina話:「今次MV係一個實實在在,大家都會去嘅地方,亦係我好真實嘅感受,歌詞中嘅紋身,係因為我過去一個男朋友有紋身,就放到歌詞當中。」

MV去年11月初去到東京拍攝,而Sabrina之前一次踏足當地已係3、4年前,對終於再踏足東京,Sabrina話:「落機時超開心,開心大叫終於可以呼吸到日本嘅空氣。曾經某年去日本好頻密,一年去咗4次,又拍過一個日本廣告,一直希望再有機會到日本工作。不過行程好緊湊,通宵機去到相隔幾個鐘就投入拍攝,連續兩、三日不停走景,雖然時間緊迫,但同攝影隊合作得好開心。」

Sabrina又透露失落時,唔會刻意搵方法令自己開心,反而享受浸沉喺沮喪嘅感覺,佢話:「有啲人唔開心會去shopping、食雪糕,我就係自生自滅派,自己會沉淪喺emo(沮喪)世界,感覺好享受,好似自己正拍攝MV一樣,等自己瘋狂沉淪又唔食嘢,呢首歌表達嘅其實就係其中一面嘅我。」

 相關推薦