藝人總動員錄製新台慶歌 傾力演唱《攜手創無限》

正在使用小窗口模式播放

藝人總動員錄製新台慶歌 傾力演唱《攜手創無限》

加載中...

TVB 55周年除咗日前已經圓滿結束嘅《萬千星輝賀台慶》之外,日前一班藝人就分別現身,為由鮑比達製作嘅全新台慶歌《攜手創無限》錄音喇。其中Gigi炎明熹就一早做定功課,仲話自己聽足「奶爸」李克勤教路,錄音之前一定要食飽先夠力夠氣咁話呀。新歌Archie冼靖峰有份參與填詞,Gigi就話唱起嚟份外親切喇。

林夏薇同胡定欣一樣有份參與,而佢哋就話非常開心齊齊錄音,薇薇仲話自己有啲聲沙要叫定欣指教呀。陳豪同樣係演唱者之一,佢就話對呢個構思覺得好新鮮喇,黃智賢同黃庭鋒同樣第一次參加台慶歌錄音,仲話希望大家感受到TVB嘅團結氣氛呀。

羅子溢就同張曦雯同時現身,Kelly就話覺得有好大壓力喇,忙住湊仔嘅子溢就話一有時間就喺屋企練習,搞到囡囡都識跟住唱呀。

跳舞高手朱晨麗就話,其實一直以嚟都想有機會涉足音樂方面,仲有一個歌手夢,所以呢次就出盡全力希望有伯樂欣賞喇。而近年有發展自己音樂事業嘅袁偉豪相對其他同事,經驗比較豐富嘅佢就比較輕鬆喇。

王灝兒 呢日就同《痞子》嘅拍檔 周家洛 同 朱敏瀚 齊齊到場,身為歌手嘅佢就自然要幫幫兩位老友喇。而朱仔對《痞子》喺出年1月舉行嘅頒獎典禮信心爆棚,就連家洛都異口同聲即時拉票呀。

 相關推薦