[電影泉攻略]「雷神」揭患阿茲海默症風險高 暫別影壇陪家人丨EP26

[電影泉攻略] 泉叔每周精選心水猛片 花絮加專訪全天候供應

「雷神」基斯漢斯禾（Chris Hemsworth）發現自己有高機率患上俗稱「老人痴呆」嘅阿茲海默症，近日宣佈暫別影壇，爭取時間陪伴妻子及3位仔女，佢強調唔係退休，只係接工作比較審慎

新片推介有《奇異大世界》講述兩父子獲總統邀請下出發去奇異大世界探險，撞到失散多年嘅老爸，三人展開一場爆笑歷險；《哥兒們》描述一名公開出櫃嘅紐約博物館館長，一直保持單身，直至喺夜店遇上一名靚仔大隻律師，二人墮入愛河。

《過時‧過節》由毛舜筠、謝君豪、呂爵安、談善言及馮素波等演出，講一場8年前嘅一場混亂冬至飯局，令一家人關係破裂，8年後想再食一頓冬至飯卻困難重重，新晉導演曾慶宏指呢個故事係講佢自身嘅故事，曾經離開過原生家庭一段時間，之後再返去食冬至飯，究竟屋企人係點睇呢個家，毛舜筠甫睇劇本已有好大感受，中國人對過時過節嘅認真同執著。

要數2022年最成功電影就係荷里活動作大片相隔近40年後再推嘅續集《壯志凌雲：獨行俠》，票房與口碑雙收，湯告魯斯（Tom Cruise）早喺5月於香港上映，最近宣佈IMAX喺12月1號再度登場。

本周票房第三位係新上榜嘅愛情喜劇《忽然心動》、第二位係取材自2013年「大角咀肢解父母案」嘅電影《正義迴廊》，第一位《黑豹2：瓦干達萬歲》穩坐冠軍寶座。