江嘉敏飛車飄移挑戰高難度 羅浩銘徒手伏車頂玩花式

正在使用小窗口模式播放

江嘉敏飛車飄移挑戰高難度 羅浩銘徒手伏車頂玩花式

加載中...

TVB籌款節目《歡樂滿東華2022》將喺12月3號舉行,江嘉敏與動作演員羅浩銘聯手表演飛車飄移,由江嘉敏負責飛車,羅浩銘喺車頂做出高難度動作,真係飄移籌款搵命博,江嘉敏同羅浩銘最近密密「練兵」。

被封「環保大道車神」嘅江嘉敏,呢日排練時稱好攰,身邊羅浩銘即刻有啲擔心,江嘉敏解釋飛車有離心力,一上到車成個人都精神晒,江嘉敏叫拍檔羅浩銘放心:「我係專登唔食嘢過嚟,驚自己嘔。」佢哋練咗幾次已建立出默契,而且「錢家班」導師好快睇到佢哋嘅壞習慣,慢慢修正啲動作。

為咗推高善款,江嘉敏同羅浩銘挑戰更高難度動作,羅浩銘飄移期間要徒手伏喺車頂,靠臂力扶實去平衡,羅浩銘坦言:「佢揸到好慢就唔好睇,要有啲速度,最驚佢真係開得太快,會飛咗我出去,有啲交接嘅動作,譬如佢揸緊車,我控制軚盤,有啲花式嘅嘢。」

羅浩銘盛讚江嘉敏膽色過人:「佢非常好,好夠膽去踩油,每次話輕輕力試吓,我第一次被佢呃到,佢個輕輕力係咁大力,但係呢個係好,現場做係得一take,所以需要呢個膽量,對成件好有幫助。」羅浩銘對自己好有信心,但係對江嘉敏嘅信心,佢笑指要再觀察多幾日。

 相關推薦