今晚一集《開心無敵長門人》嘉賓分別有「萬千星輝主角」隊嘅 黎耀祥 黃浩然 蕭正楠 張振朗 陳自瑤 同埋 賴慰玲 ，仲有平時多數都係喺節目後為大家帶嚟唔同訪問嘅「萬千星輝主播」隊嘅主播同事 周奕瑋 許文軒 陳婉衡 鞏姿希 王鎮泉 同埋 吳紫韻 。
今集嘅焦點就落喺緋聞傳咗好多年嘅 麥美恩 同Edmond許文軒身上，呢晚佢哋就全程耍晒花槍，真假就靠大家推敲喇。喺首個遊戲「開心無敵夾多士」中，佢哋已經被安排同場上陣，一向比教斯文嘅Edmond仲全程扭扭擰擰，反而Mayanne就非常投入，仲主動要求正面同 Edmond夾多士，最終多士就夾唔成，Mayanne仲咀埋落Edmond額頭，大大個唇印留喺 Edmond頭上， 非常爆笑。
之後Edmond喺「開心無敵爆大波」就出動大反擊，先係被要求講出「十個Mayanne嫁唔出」嘅理由，但係喺有主場之利嘅Mayanne以眼神威脅之下，Edmond只能以行貨讚女方「賢良 淑德」、「太多優點」，但係因為獎門人唔收貨，搞到Edmond只可以講真話爆料瘋狂攻擊 Mayanne「龍躉」、 「胸太細」、「太大食」等，最後仲爆料話：「佢唔識煮飯，淨係識打邊爐。」攞晒啲真嘢出嚟講呀。
而身為視帝嘅黎耀祥呢晚表現精靈兼過癮，祥哥同Jarvis喺「口不對心我最勁」上演皇者之戰，佢哋刀來劍往激戰超過一分鐘都分唔出勝負，最終要獎門人出手叫停比賽，仲大讚佢哋揮灑自如呀。
祥哥喺「開心無敵爆大波」又以「十個經典劇集金句」，好似「人生有幾多個十年，最緊要痛快！」、「吔屎啦，梁非凡！」、「多情自古空餘恨，此恨綿綿無絕期。」、 「我假假地都係天蓬元帥。」喚起觀眾集體回憶。
Mayanne之後請教講「吔屎啦」形神俱備嘅心得，祥仔就搞笑大嗌：「吔屎啦，Mayanne！」笑到全場拍爛手掌。而蕭正楠就要挑戰老婆黃翠如嘅底線，佢玩「爆大波」時被要求講出「港女老婆」特徵， 不過答問題前就先打定底話「唔係影射緊某人」，之後佢一輪嘴講出「鼻鼾大」、「唔鍾意洗腳」、「洗完頭唔自己吹頭」、「攞臭豬肉煮餸」等等，似乎一樣將真嘢拎晒出嚟講，好在Edwin臨尾補飛示愛：「無論點都好，我都係愛呢個港女。」曲線放閃呀。
