中年好聲音丨李泇霖鮑聖光獲得5燈晉級 曾志偉力證比賽大公無私

TVB歌唱節目《中年好聲音》星期日(27號)首播，參賽者用歌聲說出感人故事，落力發功爭取進入50強，通過首集競賽後，李泇霖、周吉佩及鮑聖光奪得5盞燈晉級，而譚依婷、龍婷、蔡穎秋、陳樂平、羅金榮、梁浩銓、曹敏寶及顏志恒亦直接晉級50強。

64歲鮑聖光係年紀最大嘅參賽者，深情獻唱《倩影》，甫開口唱歌已震懾評審，鮑聖光覺得好開心，對於評判指其聲底好似蔡楓華，鮑聖光表示之前冇聽人哋講過，而42歲李泇霖獻唱《情人知己》，佢估唔到自己獲5盞燈：「好感謝所有評判，對我嘅肯定，對於我哋呢啲plus size嘅朋友，鍾意唱歌，但機會唔係太多，有呢個機會入到《中年好聲音》就要把握機會去唱。」

周吉佩獻唱《如果沒有你》同樣獲得5盞燈佳績，佢自言狀況唔太好：「唱又唱甩咗少少，前,面又唔係平時發揮到嘅水準，我覺得好緊張。」

有Happy伯加持嘅「屯門娜娜」董幸兒獻唱《風的季節》表現失準，最終獲得0盞燈被即時淘汰，董幸兒坦言表現得唔好：「唔太記得歌詞，太緊張，可能聽到之前啲歌手唱得太勁，我緊張到喺度震。」

TVB總經理（節目內容營運）曾志偉透過收到各方好友「求助」電話，佢力證比賽絕冇黑幕：「其中一個係三嫂戚美珍啲親戚，好多某某人，個個都打嚟，我都話『我係嚟睇，冇辦法影響到啲評判』，結果都有好幾位朋友嘅親戚都落選咗。」