側田今年8年開完騷，相隔3個月再次舉行Part 2演唱會，吳若希、Bob林盛斌、方力申及曾比特等圈中人捧場，側田一向靠唱功及靚聲俘虜樂迷，呢晚表現得相當感性，指入行之後，人越紅，身邊嘅朋友就越假，又話音樂帶咗佢去好多地方，同時亦失去咗唔少朋友，又識多咗新朋友，感覺整個過程讓佢又愛又恨。
側田講到低潮期時忍唔住落淚，佢搵咗好友Eric Kwok(郭偉亮)做嘉賓一齊唱《男人老狗》，而Eric Kwok拍檔Swing成員Jerald(陳哲廬)專程由加拿大返港支持側田，Jerald與側田唱《山歌》，難得Eric Kwok與Jerald同場，不過Jerald抗拒與昔日拍檔Eric Kwok以Swing「合體」演唱，側田則指Jerald明明身穿Swing嘅外套現身，Jerald笑指：「係我留戀，人哋已經繼續前進，又做主持又呢樣嗰樣，又做代言人，又『鐵甲奇俠』，幾時輪到我。」現場觀眾笑聲不斷。
Jerald營造「不和」效果，即與老友Eric Kwok合唱《大大公司》，8年後Swing再合體與側田合唱，二人默契十足，令全場樂迷high爆。
