已為人母嘅 梁祐嘉 近日推出新歌《光之處》，新歌派台日仲原來係佢細女出生日，難怪雙喜臨門嘅佢非常興奮，仲分享疫下分娩嘅過程，Abella笑住話：「入產房都要戴晒口罩，當聽到囡囡出世嘅喊聲已經忍唔住開始喊，喊到成個口罩都濕晒。到離開產房麻醉師見到我都話『乜你仲喊緊啊？』，真係唔只母愛泛濫，直程喺淚水都泛濫呀！」
生完第2胎湊齊「好」字嘅Abella，雖然要忙住湊小朋友，不過對唱歌依然懷著滿腔熱誠，而新歌《光之處》就係送俾初生BB嘅禮物，佢話「雖然係第二胎，但臨入產房都難免會緊張，我就同肚入面嘅囡囡講：『呢首《光之處》喺送比妳㗎，我而家唱畀你聽。遲吓我同爸爸、哥哥再一齊唱畀你聽。』希望可以為我哋兩母女打打氣！」佢想藉著《光之處》嘅訊息，送予樂迷同兒女呀。
《光之處》其實係Abella去年中已籌備嘅作品，因為疫情令錄音延誤，之後又有唔同狀況令作品近日先同大家見面；歌曲原意係由自己出生、出道到成長改換名字嘅經歷，帶出人生唔同時期嘅改變同選項，然而經歷種種碰撞、天氣，只要念一轉，光就在不遠處。