導演陳十三編劇及執導之新作《我和殭屍有個約會》電影版《驅魔龍族馬小玲》已密鑼緊鼓拍攝，噚晚舉行拜神儀式，該片演員陣容近日陸續公開，電影公司今日再公佈電影版「求叔」角色，原作電視版由黃樹棠飾演，但因棠哥已離開，難以物色適合人選，所以最後將「求叔」換成棠哥親妹黃文慧 ( Bonnie姐 ) 演出，由「求妹」完成兄長心願，繼續照顧殭屍兄弟「況天佑」黃宗澤及「況復生」黃梓樂。
「求叔」在《我和殭屍有個約會》與「馬小玲」、「況天佑」唇齒相依，為佢哋提供咒符等驅魔道具及解決降魔伏妖各種疑難雜症，黃樹棠當年演繹此角深入民心，此後不少人更稱呼棠哥做「求叔」，所以可以說無「求」不成《殭屍》。
今次電影公司請來Bonnie姐喺電影版做「求叔」妹妹，Bonnie姐得悉由陳十三做導演及編劇後，二話不說便答應，Bonnie姐表示：「《殭屍》係一個膾炙人口、好受歡迎嘅電視劇，世界各地好多觀眾組織咗個殭屍粉團，同『求叔』喺facebook成日互動交流。以前《殭屍》嘅台前幕後聚會，大家都好想拍電影版，但咁多年都冇辦法成真係好可惜，當然拍電影版嘅資金同製作非常龐大，點會有人撐起呢支旗拍攝呢？隔咗咁多年，演員工作人員各散東西，大家嘅心願都無法達成，最可惜係黃樹棠『求叔』去咗第二個星球。」Bonnie姐又希望自己嘅演出唔會令大家失望，希望喜歡《殭屍》嘅朋友繼續愛戴。
《驅魔龍族馬小玲》已披露吳千語演「馬小玲」、黃宗澤演「況天佑」、蔡潔演「王珍珍」、岑珈其同謝雪心分別演「金正中」母子、吳啟洋 (Phoebus) 及童星黃梓樂飾演大小殭屍仔「況復生」、黃文慧演「求叔」妹，另外電視版陳煒飾演嘅「妙善」，就由劉心悠接棒。「妙善」源自觀音菩薩在得道升天的時候，回頭看見人間疾苦，流下最後一滴紅塵淚，眼淚化成肉身，名「妙善」，擁有預測未來的能力，而陪伴在「妙善」劉心悠身邊嘅「初春」，就係近期憑TVB劇集《下流上車族》人氣急升嘅郭柏姸。