經典電影系列《無間道》三部曲，當年除咗雲集兩大影帝劉德華、梁朝偉仲有大班重量級演員黃秋生、曾志偉、吳鎮宇同黎明等演出之外。驚人劇力同鋪陳嘅劇情，亦先後獲荷里活改編，轉眼今年已經係無間道上映20周年，電影公司將推出聲畫升級版本，重現電影系列嘅驚人魅力。
《無間道》當年橫掃香港電影金像獎同台灣金馬獎嘅多個獎項，包括最佳電影、最佳導演、最佳男主角等共15個大獎，仲被國際影壇奉為香港警匪電影巔峰之作。電影公司今次使用先進4K數碼復修同杜比全景聲(Dolby Atoms)環迴技術，將原版電影聲畫質素大幅躍升，仲會喺20年前首部曲開畫嘅同一日，12 月12號重新公映三部曲《無間道》、《無間道II》、《無間道 III 終極無間》。
早前電影公司又特別製作「被遺忘的時光–無間道經典場景」動畫，呢部由著名動畫藝術家陳達克設計嘅短片，還原多個電影場景、名場面同金句。而K11 ArtHouse亦特設巨幕特典場同杜比全景聲特典場，觀眾仲有機會獲贈對應電影集數嘅20周年紀念品，包括3D立體珍藏紀念卡、電影海報，仲有由本地插畫家Walker繪畫嘅別注插畫版明信片。