J2（82 台）今晚（2日）有蘇民峰拍住4位J2ers倪嘉雯(Carmen)、陳若思（Amber）、黃嘉雯(Carmaney) 同陳國麟(Doniven)主持嘅《開壇》，解答風水命理疑難，播出時間已安排於逢周五晚上11點，追開嘅觀眾敬請留意。
蘇師傅今集講主題係「小人」，每人身邊總有一、兩個小人，小人原來有樣睇。蘇師傅先界定何謂小人︰「能力唔夠你高，驚你爬過佢，老闆面前篤背脊，等你衰過佢。或者大家係同行，你有一定成就，諗辦法整衰你。」
師傅教大家點樣分辨小人，第一件事睇眼，佢以Amber作為例子︰「佢雙眼黑白分明、雙眼有神代表『冇機心』，心事想收都唔識收。」換句話講，小人雙眼無神，黑白並不分明。
另一類小人係喜歡講是非，好在4位J2ers嘅嘴型生得好靚，師傅告誡佢哋識朋友切忌「嘴歪牙梳」，因為呢類人鍾意「是非做人情」，師傅舉例話︰「好似外國饒舌歌手通常門牙有條罅，特別鍾意講嘢。」
Carmen投訴身邊經常有小人出沒︰「知道好多人害過我。」因此請教蘇師傅有冇辦法，一眼睇出對方就係小人，師傅話︰「見到有『風』字面相，腮骨凸出，十居其九係小人。如果加埋眉骨凹同冇眉毛，仲會加埋陰濕、狠毒。」
師傅講到一單親身遭遇，話說有位「風字」面客人，有齊上述小人特徵，有趟呢位客人已同老闆辭職，佢居然走去問師傅「好唔好搞亂晒啲嘢至走」，心地非常唔好。師傅話好在從事風水命理工作幾十年，遇到呢類面相不足10人。原來小人亦有「掌」睇，佢哋喺感情線同頭腦線之間，會有條「小人紋」。《開壇》仲會話埋你聽，去灣仔鵝頸橋打小人，到底有沒有用！記得今晚收睇！
《開壇》逢星期五晚上11點J2(82台)播出