台慶劇《超能使者》嚟到結局篇，呢晚一眾演員陳山聰、陳展鵬、劉穎鏇、Moon劉佩玥、林子善、伍樂怡、KK張國強同埋監製Jazz文偉鴻就約埋一齊食飯兼睇直播，睇到KK飾演嘅袁叔死嗰幕，子善仲忍唔住喊咗出嚟，而山聰就搞笑咁話呢餐係為KK而設嘅歡送飯呀！
講到呢場重頭戲，山聰就話佢哋當日足足拍咗5個夜晚，除咗係因為將文戲同打鬥戲分開拍攝外，仲因為拍拖期間撞正山聰囝囝Jaco出世，山聰笑言佢接完Jaco出世後，就即刻再返劇組拍呢場KK同梅姐被殺嘅重頭戲。而睇到喊晒嘅子善，就話因為平日自己都會叫KK做Daddy，加上自己又已為人父，所以當佢睇到KK同君馨場戲時，就即刻代入其中，子善又埋怨話睇完呢場慘情戲以為可以有個喘息空間唞啖氣，點知劇情仍然繼續虐心，令子善啲眼淚完全失控。
阿Moon喺劇中同陳展鵬嘅「發展」亦係劇中另一謎團，呢晚Moon就賣晒關子，話之後展鵬嘅精神狀況會成為佢會唔會再次現身嘅關鍵，叫大家記得繼續追看。
TVB娛樂新聞台噚晚就直擊《超能使者》嘅飯局情況，當中唔少網民都留言話好唔捨得套劇咁快完，仲話希望可以原班人馬再拍續集，監製Jazz文偉鴻都有睇到大家嘅留言㗎，但佢就話「見好就收」呀，仲話佢將最精彩嘅嘢喺每一套劇內都度盡晒、擺晒落去，所以佢過往嘅作品都唔會有續集呢回事，不過對於有網民提議原班人馬玩古裝加時裝，山聰即反問大家係咪想睇劉穎鏇古裝嘅造型？而Jazz就抵死咁話，到時劉穎鏇唔係着三點式而係要着肚兜，聽到一眾網民勁興奮呀！
