台慶劇《法證先鋒V》連續兩晚劇情都圍繞「十八層地獄殺人案」為主線，董應偉 關楚耀 同 卜大山 易智遠 因貧富懸殊等問題，對三名豪宅住戶動殺機，先後以殘忍嘅「冰山地獄」、「血池地獄」同「火山地獄」手法施毒手，仲恐怖將殺人視為藝術。
Dr. Fan 蔡潔 調查期間意外揭發舊樓天台嘅大型地獄壁畫，仲被大山綁架又想施以「孽鏡地獄」酷刑，好彩余Sir 黃宗澤 同井Sir 袁偉豪 及時趕到解救。大山死後，原本同Dr. Fan有感 情線嘅應偉將佢迷暈，又想以「磔刑地獄」將Dr. Fan「凌遲」處死，最後Dr. Fan幸以奇招鬆綁再將應偉殺死。
因為劇情緊湊有張力，加上畫面構圖落足心機，唔少觀眾都對呢個單元大讚。而講到當中嘅兩場綁架戲，蔡潔就話當中嘅解剖室場口非常難忘喇。Jacky話雖然睇落自己好似係全裸演出，不過其實全部都靠借位拍攝！而拍攝時正值係冬天，就令佢不斷狂震喇：「喺呢個劇集主景我拍咗好多解剖屍體嘅場面，而咁啱(被綁架)就喺最凍嗰幾日要拍晒佢。喺嗰度我有大量喊戲， 嗰段日子好似入咗個時間房間咁，不斷解剖同不斷喊。」
蔡潔又大讚扮演屍體嘅演員都非常專業：「因為佢哋唔能夠著衫，仲要瞓上張鋼板床，就算現場有暖風機暖住，依然都係超凍。我好記得有幾位演員係要濕晒咁瞓上去，佢哋一Cut機係凍到係咁震，但一話Roll機又可以完全唔郁，我好佩服佢哋，好敬業。」
蔡潔又話當自己瞓上鋼板床一刻，除了心諗「你都有今日喇」之外，亦大嘆難度高：「因為我雙手都被綁住、個口又封住咗，我作為一個活生生嘅人，要靠對眼同僅有嘅肢體語言去演繹好痛、好想大叫但叫唔到、同埋好驚嘅狀態。嗰場戲拍咗成日，我就喊咗成日，拍完對眼腫晒。」
而提到另一場被綁戲，蔡潔就大讚道具製作用心：「我喺現場都覺得布置好靚，拍出嚟好有美感。因為啲鏡有弧度，我自己瞓喺度睇自己時，我喺唔同嘅鏡入面見到我個人係好扭曲，變相呢種影象好脗合到個罪犯嘅心理同埋嗰種壓抑感，所以個Setting真係好精彩。」
不過一集之間被綁兩次，蔡潔就笑指最大難度竟係保持靚樣喇： 「瞓喺度拍戲最大挑戰係好難拍得靚，我覺得自己個頭向上好醜樣，所以全程都要留意住點樣瞓得可以靚少少。」
至於難得一嘗扮演大壞蛋滋味嘅關楚耀，就話今次過足戲癮喇：「多謝導演信任，畀我自由發揮做啲好冇表情、但內心又好矛盾嘅戲。好多時我都係去到現場憑感覺去演， 所以好多時演出嚟都係啲冇預計過嘅反應同動作，所以好好玩，亦都充份表現到自己現 實中最黑暗嗰一面。」
而要綁架蔡潔嘅戲份，Kelvin就笑指最大壓力係要快手：「佢喺現場著得好少布，但又要瞓喺嗰張鋼床度真係好凍、好辛苦，所以我好想快啲解決咗件事。」