歡樂滿東華｜精彩表演籌破紀錄善款 重溫幕後絕密直擊訪問

一年一度嘅《歡樂滿東華》馬拉松式籌得1億2千多萬善款，當中除咗大家嘅慷慨解囊之外，藝人嘅演出自然功不可沒啦，其中 譚詠麟 就同兩代聲夢成員合作演出，Gigi炎明熹亦繼上次錄音之後再同校長合唱，仲話今次感覺同上次完全唔同呀。

佢哋喺多架無人機喺半空舞動之下合唱，而校長就大讚Gigi勤力又肯學，不過就笑Gigi嘅火星式思考同講嘢方法喇。佢又話Gigi暫時仲欠一首可以雅俗並賞嘅代表作。至於兩代畢業生嘅合體亦都非常矚目，佢哋之間仲有非常好嘅關係，大家打成一片呀。

而 江嘉敏 同 羅浩銘 合作嘅驚險飄移最後順利完成，但係原來期間都有唔少驚險情況，好在冇受傷之餘仲可以成功籌得善款呀。

呂方 同 譚嘉儀 亦都再合作演出經典歌《雪山飛狐》，用原Key勁高音演出之餘，原來仲係呢首歌多年來首次現場演唱，呂方仲講笑話多年來只係同原唱拍檔 關菊英 合唱過一次咁多咋。