周日（9日）晚播出最新一集《中年好聲音》由車婉婉擔任主持，評審團則為 Maria Cordero（肥媽）、張佳添、伍仲衡、林志美、周國豐，一眾參賽者爭取50強餘下嘅26個席位。
100強參賽者中年紀最大嘅70歲吳大強，其兒子吳偉豪係喺處境劇《愛．回家之開心速遞》飾演「朱凌凌」，比賽當日，吳偉豪現身為爸爸打氣，吳大強獻唱英文歌《Unchained Melody》，中氣十足，大晒震音同高音，肥媽大讚：「好多人可能話佢好多震音，但唔震音點唱呢隻歌啫，佢用舊嘅Way唱番舊嘅歌，Feel到佢嘅Passion。」
周國豐指感受到吳大強心中有團「17歲嘅火」，更令佢憶起亡父：「我爸爸喺我好細個就已經離開咗，好多謝你頭先嘅2分幾鐘，令我有番同爸爸嘅回憶。」
是集有觀眾熟悉嘅面孔登場，佢就係《愛．回家之開心速遞》飾演「賈名媛」嘅邱芷微（Chelffy），35歲Chelffy今次參賽係希望可重燃追夢嗰團火，Chelffy患有類風濕關節炎，擔憂隨時有機會全身郁唔到，更不幸嘅係同時仲要承受男友患癌打擊，佢接受製作組訪問時坦言得悉噩耗時晴天霹靂：「嗰時仲係傾到去結婚，點知大家都一齊有病，感覺係點解係我同佢發生啲咁嘅事，好戲劇性又好真實嘅感覺。」
肥媽聞言即鼓勵：「計劃總係趕不上變化，其實當你想做某啲事、又唔會傷害到人嘅話，就應該活在當下去做，所以《中年好聲音》應該要做多幾屆！」Chelffy曾於歌唱比賽獲獎，呢次佢獻唱《可惜我是水瓶座》，到底佢嘅歌聲可唔可以同佢嘅故事一樣打動到評審？
另一有勵志又有洋蔥嘅故事係來自唱得之人，49歲丁文俊於1994年新秀亞軍，同埋何國星於1988年新秀亞軍將喺本集輪流登場，49歲丁文俊獻唱林子祥嘅《幾段情歌》，充滿感情演繹獲評審大讚。肥媽好鍾意佢嘅Feeling同Style：「有啲似巫啟賢、夏韶聲，你唱嘅歌係林子祥，但一啲林子祥影子都冇。」周國豐則直指聽到起雞皮：「有啲歌年青聽時係愛情，中年聽時係人生，丁文俊版本係感受到人生，好正。」而當年揮低樂壇天后鄭秀文、奪得新秀亞軍嘅55歲何國星，則深情演繹《夏日傾情》，到底表現如何？記得留意最新一集《中年好聲音》。