馮素波 (波姐)縱橫影視圈超過70年，圈中廣結人緣，最近主持電台節目《樂齡王國》，波姐邀請圈中一眾曾演出其仔女嘅好友受訪，今個星期請到電影《正義迴廊》飾演大律師而大受好評嘅蘇玉華做嘉賓。
54歲蘇玉華由1989年開始做舞台劇演員，後來憑《親恩情未了》、《茶是故鄉濃》等著名電視劇成功入屋，成為一線花旦，蘇玉華於2005年拍TVB電視劇《奪命真夫》首次與波姐合作，其飾演波姐女兒「殷婷」，波姐憶述當年與蘇玉華拍劇嘅經過：「埋位拍攝之前，佢好投入去睇個劇本，我又唔敢騷擾佢，但一埋位我哋場場都一Take過！」
蘇玉華被問及自己對劇本選材嘅睇法：「其實我覺得自己好幸運，經常遇到好劇本同好夥伴，就以《正義迴廊》為例，今次拍攝有好多單位都係第一次合作，原來大家對彼此有信心，對劇本有信心，神奇事情就自然會發生。」
波姐分享以往拍攝電影嘅經歷，指自己有次喺未有任何排練情況下，被導演直接安排埋位開拍而感到愕然，波姐表示：「原來當導演信任自己時，就算我角色有對白都唔會安排同我排練！只能靠自己嘅經驗理解交代畀導演。」蘇玉華直指呢個情況係好驚，就算對自己有信心，都要先同其他演員配合有默契，唔認同排練過後會令該場戲變得冇生命。
蘇玉華節目末段透露，自己好喜歡同樂意做劇前準備功夫，喺收到劇本嗰陣就會不斷向導演提問，希望清楚自己劇中角色嘅定位。佢記得拍攝《正義迴廊》前，曾向導演討論角色設定，盼能用另一個新角度去理解自己嘅角色，通常拍完就唔鍾意再去解釋太多自己嘅演繹，因為想表達嘅一面通常已經喺戲中表現出嚟。