台慶十強丨《下流》橫掃提名先聲奪人 熱門陳山聰寧獲劇集獎 視后劇鬥煒哥美儀唔相讓

TVB年度盛事《萬千星輝頒獎禮典禮2022》將會喺1月8號舉行，經過觀眾一輪投票後，大會呢日就公佈16個獎項嘅十強名單，當中台慶劇《下流上車族》成為提名之冠，先聲奪人。幾部台慶劇都有非常優異嘅入圍數字，而呢日有份入圍嘅藝人 陳山聰 、 劉穎鏇 、 陳瀅 、 陳煒 、 江美儀 同 郭柏姸 等都有現身落力拉票，

大家最關注嘅視帝視后十強出爐，「最佳女主角」有《金宵大廈2》李施嬅、《童時愛上你》高海寧、《回歸》陳煒、《白色強人II》胡定欣、《白色強人II》張曦雯、《痞子殿下》陳瀅、《美麗戰場》劉佩玥、《下流上車族》鮑起靜、《下流上車族》江美儀 同埋《超能使者》唐詩詠，問到陳煒今年奪獎嘅信心？佢即刻同旁邊嘅江美儀道歉，因為佢話呢啲無得讓，點都要畀啲信心自己，而江美儀就話因為今年每人有3票，所以佢會投畀自己、鮑姐同埋煒哥呀，但講到信心，美儀姐就話因為有鮑姐呢個金像影后在場，所以睇怕都好難贏到。

而「最佳男主角」嘅十強名單就有：《青春不要臉》丁子朗、《金宵大廈2》陳山聰、《回歸》郭晉安、《白色強人II》陳豪、《白色強人II》馬國明、《痞子殿下》周嘉洛、《下流上車族》林敏驄、《超能使者》陳展鵬、《法證先鋒V》黃宗澤以及《輕·功》黎耀祥。被視為視帝大熱嘅陳山聰，因為競爭激烈嘅關係，所以對摘下視帝就信心不大，反而係希望《超能使者》可以奪得「最佳劇集」。劉穎鏇就話對於《超能使者》可以入圍「最受歡迎電視拍檔」十強已經覺得好滿足； 至於林子善就話喺記者會之後收到最高指示，叫佢哋要落力拉票呀。

同時入圍「最佳女配角」同「最受歡迎電視女角色」嘅蔣家旻，坦白咁話自己每信獎項都想拎，鄧智堅亦都話希望大家可以投佢「最佳男配角」一票，而吳偉豪就話只要有獎拎已經係件開心事。


成為「飛躍進步女藝員」大熱嘅車氏兩姐妹 郭柏姸 同羅毓儀 ，知道自己入到十強時就好感動，羅毓儀仲話自己緊張到唔記得多謝人； 至於家姐郭柏姸就話冇諗過可以入圍咁多個獎項。

第四年入圍飛躍男嘅黃庭鋒，笑言本身自己都幾有信心，但當佢知道對手有黃建東時，信心即時打咗折呀。梁思浩、阮兆祥同吳幸美分別以唔同節目入圍「最佳男主持」同「最佳女主持」，佢哋就話唔會視對方做競爭對手，同時亦都感謝有份投票嘅觀眾。

繼續接受各位觀眾投票  https://act.tvb.com/vote/tvb2022 請留意相關細則