由 陳豪 同 袁偉豪 主持；一連6集全新飲食節目《豪遊咖啡》將喺20號首播。近年本土特色咖啡店如遍地春筍，為咗幫大家尋找唔同喜好同口味嘅「靚啡」，兩位型男將喺節目中遊走香港各區，發掘大大小小熱門或隱世咖啡店，順道一覽新興或鮮為人知景點。
兩位主持每集都會邀請一位「啡友」一齊品味咖啡、一邊細說咖啡與生活，共度溫馨「Coffee Time」。首周登場嘅嘉賓分別係 李佳芯 同 黃翠如。而20號晚播出嘅第一集，「雙豪」會同大家一齊探索上環同西環嘅咖啡店，當中仲不乏2021年入選國際旅遊網站Big 7 Travel當中，「亞洲50間最佳咖啡店」第39位嘅澳洲風格咖啡酒吧、仲有全港首間「視障按摩x咖啡」社企 Café、同埋結合環保概念嘅「自助洗衣x咖啡」網紅店。
阿Mo同Ali其中一站係充滿「挪威居家味道」嘅咖啡店，其間仲曝露咗Ali嘅「女神」飲食習慣， Ali話自己入行後因長期唔夠瞓而踏上「歎啡不歸路」，平日仲會自己手沖咖啡。Ali又自爆有個Café夢：「如果我唔係做藝人，以我性格會開一間咖啡店，雖然未必賺好多，但起碼可以同唔同人傾偈、接觸、講故事。」
周三晚一集嘅探啡之路去到尖沙咀，阿Mo仲化身「一日店長」為大家介紹自家品牌嘅Marshmallow Latte同Tiramisu Latte，親手認真製作表情仲非常Man。之後雙豪又去到一間以 紐西蘭為主題嘅生活咖啡店，當中嘅Irish Coffee仲令阿Mo勾起澳洲讀書嘅回憶。另外Ben又見識藝術打印咖啡、又去到希臘風打卡Café一嚐 2020年榮獲澳洲國際咖啡金獎嘅咖啡豆炮製而成嘅Latte。
Ben之後會合翠如邊食邊傾，翠如笑言同Ben合作拍攝《使徒行者2》時，因對方「跳出」早餐框框：「因為喺內地工作時間長又凍，所以好需要一杯能量飲品，係你令我覺得咖啡有種安慰嘅感覺。」
阿Mo又喺節目自爆拍劇期間會喺錄影廠「開檔」供應私伙咖啡，仲憶述帶埋磨豆機喺現場手沖咖啡請劇組飲：「嗰時磨豆嘈到幕後大嗌『靜啲好冇呀？！』，後來因為唔想阻到拍攝進度，我就擺咗部3公升咖啡機喺度， 見到人哋飲咖啡咁開心，係遠勝自己飲咖啡嘅感覺。」
至於Ben愛鑽研咖啡之餘，亦係鐵騎發燒友，不過兩年前升呢人夫之後就大為改變：「可能結咗婚嘅關係，我開始鍾意靜態啲嘅興趣，例如經常去百貨公司家品部睇砂煲罌罉，當然望住架電單車好靚、抹吓佢都好爽， 但都唔及拎住個好好用嘅煎Pan煮一餐好好嘅飯餸。」
《豪遊咖啡》12月20號起 星期一至三晚 22:30 翡翠台