仲有啱啱一個月就要送虎迎兔喇，三位香港《聲夢傳奇》歌手 何晉樂 文凱婷 同 林智樂 ，早前就邀請咗《聲夢傳奇2》(馬來西亞)嘅 彭詡越 梁宸語 王紫薇 陳泓升 同 潘乾政 ，合作錄製 賀年新歌同MV《想要乜嘢都可以》， 提前渡過一個開心難忘嘅新年。
三位香港東道主更精心準備咗連串節目同奇妙旅程，大家一齊穿越古今， 感受自古以來過年嘅傳統熱鬧，一齊食買玩歡欣過新年，令拍攝過程既開心又好玩。當日一早，7位藝人就以色彩鮮艷嘅衣著為MV投入拍攝工作，首次拍攝賀年MV嘅佢哋表現雀躍。
新年新開始，佢哋亦藉住《想要乜嘢都可以》預祝各位兔年如兔仔一樣活潑靈活，身體健康，一家人齊齊整整，要乜有乜，歡樂幸福每一天。
文凱婷仲話：「今次有機會參與賀年MV拍攝非常感恩。我最鍾意嘅節日就係農暦年，呢兩年參加咗 《聲夢》後，有時節日會喺工作中渡過，但識到一班新朋友非常開心。今次又可以同大馬《聲夢2》成員一齊拍MV， 希望繼續有多啲合作機會。」
何晋樂就覺得《想要乜嘢都可以》呢首賀年歌歌詞易記，內容亦好有意思！雖然同時要唱粵語、國語同Rap，不過一樣難佢唔到。MV內容以穿越時空貫穿，Felix就覺得非常興奮喇：「平時我除咗唱歌之外，都好鍾意煲劇，尤其啲神怪、科幻片！所以今次拍攝時我非常投入，覺得自己好似魔術師咁，影張相就變走哂佢哋，非常好玩！」
至於馬來西亞成員彭詡越 梁宸語 王紫薇 陳泓升 潘乾政 喺MV拍攝空檔期間又不忘大讚對方，仲認為MV曲風富有活力，一聽就令人留下深刻印象。身為《聲夢傳奇 2》(馬來西亞)冠軍嘅彭詡越自細就喜愛唱歌跳舞，所以今次拍攝令佢感到非常享受，佢話：「歌詞融入咗粵語同國語，語言好似將大馬同香港拉近咗，感覺非常親切。亦好享受同香港《聲夢》三位藝人合作。」 而亞軍梁宸語同季軍王紫薇，都覺得今次拍攝好似提早過年一樣，因為大家又扮兔仔、又扮大頭佛非常有趣。 拍攝當日，陳泓升同潘乾政仲對首次到訪電視城古裝街大表興奮呀。
《想要乜嘢都可以》有兩個版本，除咗香港版由TVB香港同馬來西亞《聲夢》組合表演，馬來西亞版獲得Mobile Legends: Bang Bang (全球最受歡迎MOBA手遊之一) 全力支持，更邀請咗敖嘉年參與拍攝。
拍攝當日，以一身大桃紅色帥氣裝扮現身嘅嘉年朝氣十足，加上面上燦爛笑容，非常配合賀年氣氛，嘉年仲話自己非常鍾意過年呀：「農曆新年象徵新嘅一年，新嘅開始！我都預祝各位兔年身體健康、萬事如意！」