「一百個人有一百種正義嘅方法」呢句對白係黃庭鋒飾嘅梁志新，喺20號晚播出嘅《法證先鋒V》入面，對住飾演余星柏嘅黃宗澤所講嘅對白。劇情講因過份追求正義，而令熱血社工雁菊、法醫天才傅劍成同埋法證部梁志新走上歪路，最終更為正義而殺人。

劇中三人為正義而殺人。

劇中庭鋒同Bosco說「正義」而爭論嘅一場戲，由於佢哋一個冷靜一個激動，令整場戲相當有睇頭，而庭鋒亦都話呢場戲令佢過足戲癮：「通常你識穿一個人會好激動，但 Bosco 就揀咗用冷靜嘅手法去表達。」庭鋒又講返自己第一次拍劇就係同Bosco合作，當時對方非常照顧自己：「嗰時我要拍動作，但因為冇經驗，我冇戴 護墊，Bosco見到就即刻叫助手攞啲護墊畀我戴，仲話:『唔戴自己蝕底咋』。」
呢場爭論戲好正。

庭鋒指Bosco好照顧後輩。
而飾演傅劍成嘅丁子朗，一再強調自我好鍾意劍成這個角色，仲話呢個角色對佢嚟講係個大挑戰：「因為個角色比較沉鬱同冷靜，好多感情都要靠眼神湧現出嚟。」談到要喺劇中瞓「雙人瞓棺材」，丁丁就話拍嗰陣其實自己好驚，加上要有個人瞓喺佢上面，所以除咗要承受住重量外，仲因為副棺係環保棺材，所以佢哋都要好小心怕整爛，丁丁話：「同埋要閉氣， 否則會好容易畀人覺得你郁。」而有份拍攝呢場戲嘅庭鋒，就笑言拍攝期間因為 Erica 唔識用力而令佢拉傷咗條腰：「我同陳嘉慧負責搬棺材，可能佢唔識用力啦，啲力食晒喺我度，加上我又拎得個位唔夠啱，條腰咁就傷咗。我有即刻睇物理治療，好彩冇乜嘢。」

丁丁要瞓雙人棺材。

至於飾演雁菊嘅Erica，喺劇入面就要挑戰醉酒、虛弱同洋蔥式真情剖白戲，當中佢仲有近乎素顏上陣拍攝呀。

無綫 55 周年台慶劇《法證先鋒 V》，星期一至五 20:30 翡翠台

台慶劇《法證先鋒V》喺23號播出大結局，而當中劇情絕對係Big Boss Thena 蔣怡 飾同余Sir 黃宗澤 飾嘅對決。Thena落網後余Sir前往探監，佢哋喺長達5分鐘嘅探監戲中，除咗你來我往嘅精彩對白之外，蔣怡似笑非笑同魔性十足嘅眼神亦非常搶戲，獲觀眾大讚。

Coco受訪時就透露呢場戲最大難度係要對住鏡頭演出同唸對白喇：「因為我完全睇唔到鏡頭背後男主角係咩表情，所以只能靠想像去演。因為想Keep住連貫性唔想斷開，所以背台詞背咗好耐，背到瞓著咗，瞓完再繼續背，全日都喺度背台詞。」

Coco嘅陰森表情令人睇到心都寒埋

至於全集最大迴響，亦係Coco氹掂Bosco閉眼一分鐘後，Bosco就由木訥變成一樣似笑非 笑，仲向Coco話：「係咪每個人都會成為你心目中嘅小丑？」之後鏡頭一轉就去到Bosco 精心化小丑妝場面，仲以陰險爆燈嘅笑容為全劇畫上句號。

Bosco喺結尾化嘅「法證標誌」小丑妝，唔通係為後續埋下伏線

唔少觀眾都猜測Bosco探完Coco監後化小丑妝，係「成魔」嘅徵兆，而當事人Bosco就大賣關子：「個小丑妝都係一個伏筆嚟，係咪真係會開《法證VI》呢？大家都唔知嘅，都係秉承番個小丑傳統啫。大家問我時，我都係叫大家估吓個結局咩意思。」

Bosco又話小丑妝化妝需時：「的確係花咗好多時間，因為係由零開始，一邊化一邊拍，化一啲又拍一啲咁，主要個底當然都由化妝師化， 我只係負責填色。」而講到拍攝搶救 王敏奕 戲份時既要人工呼吸、又要心肺復甦，Bosco就話因為同Venus太熟，所以拍攝時零尷尬：「當然拍之前都會禮貌上溝通吓，同做足安全措施嘅。

對於被指係「法證暖男」，仲經常送「Bosco牌保護Pad」以免對手受傷，Bosco就話係同自身經歷有關：「我自己拍動作戲受過好多傷，所以成日會自備一袋Pad，有時見到佢哋冇墊到保護Pad，我就會借畀佢哋用，拍戲最緊要大家唔好受傷。」 

喺劇中同Bosco有唔少粉紅泡泡嘅Venus，同型男前輩Bosco拍親熱戲會唔會有緊張同尷 尬時，佢就竟然好似有啲嫌「唔夠喉」喇：「冇太緊張，因為唔算太親密，哈哈！結局最難忘係貨櫃戲被Bosco營救嗰場，一來係佢第二次救我，二來拍攝時係Bosco生日。」佢仲自爆成日獲 Bosco特別對待：「佢的而且確係一個暖男，好照顧身邊所有人，鍾意請大家食嘢，不過我就成日畀佢整蠱。」

Venus爆Bosco係一位暖男嘅同時，亦係非常鍾意整蠱人嘅百厭星