謝高晉 同 何天嵐 日前為Youtube頻道拍攝網劇《千金難買心頭獎》，仲有機會同擔任特別嘉賓嘅鵬哥 盧海鵬合作。何天嵐仲話鵬哥非常nice，所有戲份都非常搞笑。高晉仲話：「鵬哥一出嚟嘅氣場就係搞笑，未roll機都已經有好多笑料出現喇。」
呢部網劇主要講述男女關係，飾演情侶嘅Wren同高晉，就話劇中Wren超專制，不過現實中佢係一位比較喜歡崇尚自由嘅女仔，鍾意同伴侶有適當空間去做自己鍾意嘅事咁話。
Wren又話鍾意男仔穩重、開朗同陽光：「男朋友氹自己係甜蜜行為，女仔偶爾都會男友撒嬌增進感情。」佢仲話有次自己病咗，男朋友每日送藥又外賣鍾意食嘅嘢，令自己非常難忘。
至於身為「暖男」嘅高晉，就話會以美食氹女友喇：「通常都係帶佢食啲佢鍾意食嘅嘢，耐不耐整啲小禮物，但講到最易氹就肯定係做佢嘅柴可夫司機，接收工再一齊去食飯喇。」
對於女友曾為自己做過嘅感動回憶，高晉就話一次去上海旅行，當時女友為陪自己寒冬下跑步搞到凍病最難忘：「知道對方願意為自己做平時唔會做嘅事，甚至成為自己的樂趣，的確係一件好感動同幸福嘅事。」