/public/article/images/202212/9e52c625-5ffe-4969-9ad7-1d8aa8298524.jpg)
由林二汶錄製旁白、一連十集嘅《回家》，每集邀請唔同演藝界嘉賓同名人，以單元故事形式介紹全港各區特色文化之餘，亦會深入嘉賓嘅成長地—公共屋邨同周邊地區，同大家跟隨嘉賓嘅腳步重遊舊地，同時一齊回味充滿人情味嘅「屋邨生活史」，見證香港 人嘅奮鬥故事。
節目首兩集嘉賓分別係金馬獎影帝 謝君豪 以及著名主持人 森美 ，其餘嘉賓仲有視帝 黎耀祥 吳業坤 黎諾懿 韋家輝、韋家雄兄弟 仲黃智賢 等。
首集嘉賓 謝君豪 喺彩虹邨長大，已接近20年未有踏足成長地嘅佢，重遊舊地見到大小事都新鮮喜樂， 雖然好多角落都已同回憶中有唔少落差，不過依然無損君豪話當年嘅興緻，除咗大玩童年強項「消防員式」」瀡落後樓梯外，又喺製作組協助下再探同昔日舊居類似間格嘅單位，君豪感嘆：「呢度當年係天堂嚟喇，當你由劏房搬嚟呢度，又有自己廁所、廚房，仲唔係天堂係咩？」
君豪繪形繪聲憶述當年家家戶戶等睇熱播劇嘅搞笑場面：「我記得嗰時全條巷都睇緊《倚天屠龍記》，頭幾集都係秋官童年，終於等到張無忌長大變秋官喇，喺佢個頭出緊煙時，突然出 片尾roller，全條巷即時大叫『有冇搞錯』， 嗰時睇電視係有呢個氣氛。」
君豪亦走訪當年經常流連嘅錶舖、士多、麵包舖及茶餐廳等，當中最搞笑係君豪竟然喺充滿歷史嘅錶舖，同童年時夢寐以求嘅卡通錶「重逢」，令君豪童心爆發： 「以前喺東村食意大利粉已經覺得快樂，依家你要去意大利先覺得快樂」。
而第二集嘅嘉賓森美喺葵盛西邨長大，笑稱成條邨都係「自己屋企」嘅佢，去到每一處都能撞見朋友。對昔日時光暢所欲言嘅森美自爆頑皮史， 仲搞笑分享獨特「籮柚夾雞尾包」食法，佢拎住新鮮出爐嘅雞尾包直接坐扁，仲大談提升好味秘訣，令現場街坊笑到肚痛。
製作組每集都會向嘉賓獻上「回憶小心思」，君豪同森美分別獲贈「武林秘笈」同「金絲貓」，森美仲以呢份禮物同邨民小朋友「熱鬥」，唔少小朋友又驚但係又躍躍欲試。佢哋又分別舉行相展同聊天室，君豪仲因而重遇昔日小學同學，到底係巧合定係製作組刻意安排呢？而森美喺重踏昔日玩樂之地時又感觸落淚，記得29號起留意《回家》喇。
《回家》12月29號起 逢星期四、五晚 22:30 翡翠台
