郭柏姸憑TVB台慶劇《下流上車族》飾演「車芊芊」而人氣急升，呢日佢現身冬日美食節活動，同廚師一齊炮製甜品，見佢切食物嘅刀工唔錯，郭柏姸笑指最拿手係整親子丼、香蕉班戟及朱古力蛋糕。
郭柏姸偏好整甜品係有原因：「覺得食完甜嘢之後，個人開心啲，所以偏好整甜品，用啲健康啲食材去整，食完之後『罪惡感』冇咁大。」郭柏姸亦有興趣拍烹飪節目，非常鍾意煮嘢食。
早前郭柏姸喺《歡樂滿東華》唱歌時被指「魔音」，佢唔介意呢個新花名，承認喺唱歌方面有好大進步空間，決心抽時間學唱歌擺脫「魔音」之名，希望可以唱首好歌畀大家聽，更獲林敏驄傳授唱歌技巧，郭柏姸近排拍新劇挑戰飾演女警，拍攝前有武指教導佢練習踢腿，最難係學揸槍，眼神同姿勢要專業，目前郭柏姸要努力舉鐵練大力。
