蘇麗珊做咗演員8年，今年踩過界做埋歌手，至今已推出3首作品，新歌《愛情只是藝術品》更親自作曲，似乎有意走唱作人路線，佢接受訪《StarTalk》訪問，指中學時期鍾意參加歌唱比賽，蘇麗珊喺三年前，獲歌唱老師露雲娜鼓勵做歌手。
蘇麗珊有時拍完戲就想記錄一個角色嘅心情，開始寫一啲旋律，佢慢慢學彈結他演繹首歌出嚟，後來試音真係得咗，蘇麗珊覺得拍電影比唱歌更緊張，因為片場真係幾十個人望住自己演戲，又怕阻礙別人收工，而蘇麗珊首次入錄音室唱《不是男孩》，多得陳考威好nice，令蘇麗珊冇咁緊張。
蘇麗珊指新歌《愛情只是藝術品》呈現暗黑面，蘇麗珊兩年前寫好呢首歌，因為當時遇上疫情，再加上當時佢喺美國學戲回港，須隔離兩個禮拜，留喺屋企好鬱悶，將呢種情緒記錄下來，佢開心獲公司支持，起用佢嘅作品，開會嗰陣已幻想呢首歌係一個恐怖愛情故事，所以拍咗劇情類嘅MV結局留白，希望給予更多想像空間。
蘇麗珊嚟緊亦會拍電影，希望歌影同步進行，佢直言未有太多時間感受生活：「少咗出去玩，拍拖時間唔多，少咗見朋友，做演員一年拍兩、三部作品，用嘅時間唔會好多，多咗時間去增值自己，做咗歌手反而呢啲感受生活嘅時間少咗，壓力大咗，少咗放鬆嘅時間，而家要學分配時間。」
