J2 節目(82 台)今晚(30號)有蘇民峰拍住4位J2ers倪嘉雯(Carmen)、陳若思（Amber）、黃嘉雯(Carmaney)同陳國麟(Doniven)主持《開壇》，解答風水命理疑難，逢星期五晚上11點播出，蘇師傅今集講嘅主題係「子女」。
俗語有云「唔怕生壞命，最怕改錯名」，幫子女改名費煞不少父母思量，蘇民峰師傅從事風水命理多年，指點過唔少父母迷津，但每次風水改名，「瑩」字從來都唔會用，至於係咩原因？名裏面有或者想改呢隻字嘅觀眾，就要留意今晚《開壇》！
講開生兒育女，原來Carmen同Amber母性極重，佢哋聽得特別留心，Carmen更每事問，師傅講到每一個位，佢都問到底。Carmen接受訪問時表示十分喜歡小朋友，所以想知將來會唔會有得生，Carmen係家中長女，有一個細佬，佢成日憧憬，將來有幸福家庭生活，一仔一女，佢有諗過生一個，但係怕小朋友成長過程好孤單，生3個又擔心其中2個杯葛另外一個，所以都係生兩個。」佢透露每次同朋友講開，佢都被取笑話「男朋友都未有，做乜諗到咁長遠」，佢笑言諗吓都開心。
Amber係家中獨女，自少嚮往仔女成群嘅大家庭，她坦言細個超級想要兄弟姊妹陪伴，但媽咪話照顧多一個搞唔掂，佢笑指心目中至少生2個，因為一個人好孤獨，兩個小朋友一齊成長、一齊學習會開心健康得多，Amber笑言當初媽咪生一個嘅原因︰「師傅話我耳大、鼻扁係頑皮相，細路仔時我係會坐唔定，周圍跑來跑去，大聲叫、所以媽咪話唔夠膽生第二個。」Amber一直希望生兩個以上，湊得掂嘅話生4位小朋友都冇問題。
另外，今集節目蘇師傅講到「人中」、「卧蠶」同「歸來」幾個位，可以相出將來會唔會有仔女、仔女品質以及佢哋嘅「父母緣」，最緊要一樣係睇「眼眉」位，會暗藏螺旋紋，此紋關乎損傷父母，今晚蘇師傅會教你破解方法。
《開壇》逢星期五晚上 11點J2 (82台)播出