馬德鐘主演嘅TVB新劇《有種好男人》熱播中，馮素波喺劇中飾演馬德鐘嘅生母，二人「非一般母子關係」，最終冰釋前嫌，「馬神」馬德鐘接受馮素波電台節目《樂齡王國》訪問。
馮素波喺節目開首先分享對馬德鐘嘅印象，佢記得馬德鐘初入行時比較被動，唔太鍾意講嘢，後來先知對方做模特兒入行，馮素波稱最愛馬德鐘喺《衝上雲霄》扮演飛機師嘅角色造型，見馬德鐘著機師制服，顯得份外靚仔，笑言當年自己被呢個造型迷倒！
二人雖然認識多年，但一直到2021年拍《雙生陌生人》先有機會以母子檔合作，談及佢哋新作《有種好男人》，佢哋率先分享劇中關係為「非一般母子關係」；下周播出將講馬德鐘決定約會李佳芯，李佳芯擅作主張幫佢約咗「女客戶」，結果李佳芯被馬德鐘痛罵，後來陳自瑤告知李佳芯呢位「女客戶」就係當日拋棄馬德鐘嘅生母(馮素波飾演)，李佳芯告知馬德鐘馮素波提前離港，令馬德鐘趕及見馮素波，二人冰釋前嫌！馬德鐘喺劇中要跟波姐擁抱以冰釋前嫌，呢一幕獲劇組監製大讚，波姐笑言：「有個咁靚嘅男人畀我攬，都唔知幾耐無男人攬過我喇！」馬德鐘笑住回應：「我又何嘗唔係攬得好舒服呢！」
馬德鐘非常欣賞波姐面對人生嘅態度，尤其波姐經歷丈夫離世期間，仍然積極努力面對生活，令佢大感佩服，佢回想起當時波姐寧願回公司開工拍攝、搵同事聊天，都唔願留喺家中獨自對住四幅牆，「佢將工作變成輕鬆嘅事，變成一個搵同事交談嘅機會，從而搵到樂趣，我覺得呢個係一種專業諗法嚟㗎！」
馬德鐘成為素食主義者五年兼戒咗飲酒，佢直言對以往嘅自己感到陌生，因為父母離開、身邊許多人身體變差，令佢近年變得更珍惜身邊嘅人和事：「我唔想等到身體有警號話我聽唔得，我先至識得停。」馬德鐘仍十分喜愛工作，同時好享受每份工作嘅過程，以及跟每位拍檔合作機會，佢指Liza姐（汪明荃）同松哥（劉松仁）對佢嘅演藝路上影響好大，喺前輩身上睇到「藝德（藝術德行）」嘅重要，馬德鐘正在學習佢哋用一種認真看待、感恩嘅心態去尊重呢個行業，繼續努力工作。