關智斌（Kenny）於12月30號正日生日，與過百fans舉行生日聚會，場面墟冚，Kenny更坐勻每張枱跟fans互動，「坐枱」互動頓成搶手貨。
Kenny甫到場，先跟現場所有fans大合照，隨後Kenny笑言今次「搞大咗」，原來今次籌備時間好趕，大約兩、三個禮拜之前，Kenny先提出想同fans過今年生日：「因為之前應承咗佢哋嘅嘢，我乜都冇做過！本來好簡單諗住大概二、三十個人，簡單食飯，諗唔到最後搞咗成100人出嚟，咁多人坐咗喺度，多謝你哋冇唔記得我。I love you all！Thank you！」
Kenny向fans真情剖白，坦言未必記得晒fans個名，不過fans送畀佢嘅嘢，佢全部都有睇晒，Kenny讚fans好有才華，有啲彈首歌、有啲識畫畫，因為fans支持及喜愛，令佢覺得好有福氣：「佢哋亦都會因為我嘅歌令到佢哋喺某段時間得到治癒，呢個係我最大嘅福氣，因為我做嘅作品可以得到你哋嘅喜愛，我覺得好榮幸。」
Kenny來年將繼續拍攝自己喜愛嘅電影同電視劇，而在場fans則希望佢開show，Kenny立即回應：「係喎！開show喎！真係技癢，我都好耐冇唱歌。真係好衷心多謝大家，所以我嚟之前已經講：『你哋有乜嘢需求我盡量滿足！之前應承咗幫你哋簽嘅專輯、寫真集、相等等，總之來者不拒！』」隨後一名fans拎出一張Kenny半裸poster要求簽名，Kenny笑謂：「嗰張可以收埋佢！可以收埋佢！呢張已經係廿年前嘅裸照呀！我都真係唔好意思，嗰陣時啱啱出道。呢張相應該有廿年，張紙仲未黃嘅？哈哈，你又keep得幾好喎！」
Kenny透露上次fans club聚會已經係十多年前，早幾年推出專輯、寫真集時，曾答應舉辦簽名會，但因為疫情關係，最後咩都冇簽過，Kenny表示：「我都幾內疚，因為佢哋成日喺IG留言畀我、成日都鬧我，呢度差唔多每個人都鬧過我㗎，哈哈！話我成日走數，跟住我就諗，咦！不如今年生日趁呢個機會畀佢哋當面鬧我。」
Kenny為咗滿足fans，更坐勻每張fans枱，跟fans簽名、自拍及傾偈等，全部有求必應，「坐完枱」後，Kenny笑指「坐枱」互動成搶手貨。Kenny將今年嘅生日願望送畀fans，希望大家最重要係身體健康、開開心心。