無綫綜藝歌唱真人騷《中年好聲音》，元旦夜播出一集的第二部曲《挑戰！兩個只能活一個》圓滿落幕，原來根據賽制，第二部曲將誕生 24 個出線名額，但係一眾參考者鬥到最後，只得 23位選手成功出線，於是就由「100 強+50 強」兩個回合入面，拎得最多燈數嘅選手可以贏得最後 1 席位。結果 周吉佩、李泇霖 同 何博文 同樣獲得 8 盞燈成為最高分選手，主席評審肥媽見到咁，就開金口畀晒三人同時「復活」，令出線名額由 24 個增至 26 個。
而今集獻唱張學友《留言》嘅魏嘉信，成功升呢成為5燈選手，亦係今集唯一獲得5燈嘅參賽者，肥媽同呂方兩位都對作讚賞有加。39歲嘅魏嘉信係一名律師，佢接受製作組訪問時，就話有同自己兩個小朋友講要去參加比賽：「佢哋問我幾時先可以返嚟同佢哋玩，我聽到都心噏，但另一方面我都好開心，因為佢哋好重視我。」
下集《中年好聲音》將進行第三部曲《團戰！影視金曲生死鬥！》，晉級嘅 26 位選手將分成六組進行比賽，分別演繹六首唔同風格嘅歌曲：《今宵多珍重》、《年少無知》、 《燕尾蝶》、《心急人上》、《女神》同《領悟》。當中最高分嘅兩隊將全員自動晉級，而其餘四隊就將會有成員被淘汰。
呢次製作組邀請咗歌手林二汶擔任呢個回合嘅導師，雖然二汶經常為選秀節目擔任導師，但係「Bill哥哥」吳大強似乎唔多諗得對方，喺出發揀歌期間更「無視」導師二汶直行直過，令到二汶只好尷尬咁主動同Bill哥哥say hi打圓場。而另一單笑料就係原本打算加入《女神》組嘅則顏志恒，因為唔知門鎖住就係代表間房名額已滿，所以強行「爆鎖」而入，嚇窒房內一眾參賽者，場面搞笑。
此外，《中年好聲音》嘅節目主題曲 《我們的名字》MV 將於2號 20:00 喺 翡翠台首播。
分組名單：
《今宵多珍重》：吳大強(隊長)、馮志豪、龍婷、應德榮、李佳
《年少無知》：劉智衛(隊長)、區俊傑、柳冕、羅金榮
《燕尾蝶》：丁文俊(隊長)、曹敏寶、顏志恒、魏嘉信、周吉佩
《心急人士》：梁浩銓(隊長)、支嚳儀、李泇霖、何博文
《女神》：林鉫徫(隊長)、陳早怡、羅啟豪、鮑聖光
《領悟》：涂家堯(隊長)、李思林、彭澤英、梁愷庭
《中年好聲音》逢星期日 21:30 翡翠台播映
