J2 舊年推出咗多個重頭綜藝真人騷，好似《港女野人》、《CP訓練營》仲有《仔仔一堂》等等。而一踏入2023年，J2就再推出全新類別真「人」騷，集合行天橋、問答環節、才藝表演同水著競技等多項唔同元素，測試各參加者嘅潛藏實力，誓要為業界捧出耀眼超級新星。

雖然節目形式似足真人騷，不過參與主角就並非人類，而係毛孩界代表—狗狗！堪稱香港電視史上首個選美真狗show、被視為狗狗版《超級模特兒新秀大賽》嘅《超級毛特兒大賽》，所有參賽狗狗將同奴才共同經歷一場最獨特、最Bling Bling兼且最嘈吵嘅選拔賽，奴才同狗狗都要接受唔同類別嘅Model級考驗，爭奪史無前例首個 「超級毛特兒」殊榮。 

除咗競賽內容新穎刺激又吸引，製作組仲邀請請咗寵物界星級團隊，好似馴犬師、攝影師、 美容師、服裝造型、Doga(狗瑜伽)同營養師等，務求全方位釋放參賽狗狗嘅潛藏星味；主持陣容亦全部都係愛狗之人，好似之前憑《下流上車族》成功彈出嘅J2er 黃嘉雯 、主持經驗豐富嘅 周奕瑋 ，仲有港姐冠軍 向海嵐 。

Anne首次為J2擔任主持

入行多年嘅向海嵐今次首度登陸J2擔任主持，更係佢首個真「人」騷節目主持工作，佢仲話：「之前港姐都有拍過類似真人騷嘅節目，但係嗰次唔係做主持，但我真係全程都做得好投入，係一個好難忘嘅拍攝經驗。今次知道J2會搞咁特別嘅真狗騷，講真自己都心郁郁想參加埋一份，不過後尾製作組話之所以邀請我做主持，係因為希望我喺選美比賽嘅經驗，可以令呢個節目出現更好睇嘅火花，仲話個節目好多選美元素，好啱我，所以我就一口應承咗喇。」

自小已鍾情小動物嘅向海嵐，曾養過松鼠狗，亦當過貓奴，近年則有一隻名為Chloe嘅貴婦狗。由於向海嵐同Chloe一起生活，令愛犬變得極為黐身，不郁啲就會狂吠佢，仲會爭寵兼呷乾醋，足證佢平時何等寵愛狗狗喇。

製作組由已經喺社交平台正式公開招募，仲請來 程浩駿 同 招浩明 等，同唔同類型嘅可愛毛孩進行「表情大激鬥」，結果成功製造出「神同步」 表情同節奏，相當有趣。而同招浩明激鬥嘅，正係佢來頭不小嘅愛犬 Romeo，曾參與《愛‧回家之開心速遞》仲有新劇 《寵愛Pet Pet》嘅Romeo絕對是星級狗狗。招浩明受訪仲透露花咗幾個鐘頭拍攝宣傳片，雖然有一定難度，不過過程尚算順利。

招浩明被Romeo拖到凌空飛起

佢仲話宣傳片中被Romeo扯飛嘅部分，原來試過好多唔同方法拍攝：「試過由高跳落嚟，亦都試過原地跳，同導演夾咗唔同 嘅做法，務求做到最好嘅效果，好開心最後出嚟嘅畫面都幾有動感。」

參加傳送門: http://bit.ly/3I8W4JX

踏入2023年舉行香港電視史上首個狗狗選美騷《超級毛特兒大賽》，將會跟觀眾見面，呢日一眾節目主持向海嵐、周奕瑋、黃嘉雯及鍾柔美，帶埋自己嘅愛犬現身面試會場，透過才藝表演及問答環節等，甄選參賽嘅「毛特兒」，好難得可以帶埋愛犬一齊開工，不過向海嵐同周奕瑋嘅心情好唔同。

向海嵐好開心同愛犬開工，佢好喜歡去邊都帶埋愛犬，亦希望香港有更多可以帶埋佢哋一齊去嘅地方就好，周奕瑋反而覺得好大壓力：「佢以前細個我帶佢拍好多節目，畀佢出吓鏡玩吓，自從佢上咗年紀，就冇再帶佢出嚟見啲大場面，對佢嚟講係一件好大嘅事，好擔心佢適唔適應到，佢頭先仲震緊，而家好啲。」

今次比賽競爭激烈近6百位參賽者前來面試，只有少數「毛特兒」有機會入圍，周奕瑋透露感人故事係獲得加分，向海嵐笑指自己好易喊，呢日成功吸引到一班愛狗人士前來；鍾柔美自細訓練愛犬茶茶，黃嘉雯則幫狗狗克服分離恐懼，自己有時要上網睇教學片，學習訓練狗狗。