王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。
新片速遞都未講，賀歲片《毒舌大狀》嘅 黃子華 同 謝君豪 就率先打尖唱雙簧，大家記得到時買飛入場，唔係就隨時俾人告喇。而今個星期有幾部新片同大家見面，先有動作喜劇《伙星行動：扭計特攻》，以 #積遜史達頓 同 #晚格蘭特 幾位隱世特攻聯手，阻止壞蛋富豪將滅世武器流出。
之後有《劇場版歌之☆王子殿下♪ 真愛ST☆RISH TOURS》，改編自人氣戀愛冒險遊戲，第2度登上大銀幕嘅新作，ST☆RISH成員繼續展現佢哋嘅舞台魅力。之後係《通往夏天的隧道，再見的出口》同樣改編自熱門動畫，男主角因為妹妹離世，遇上轉校女生一齊探險，期望將願望實現嘅故事。
傳記式電影《雲妮候斯頓：與愛共舞》，將已故一代經典流行天后嘅事跡重新向觀眾呈現，令傳奇繼續流傳。 #娜奧美艾奇 喺新片就要扮演呢位無人不曉嘅天后，對佢嚟講可以話困難重重，佢仲認為電影係世界呈獻俾已故雲妮嘅情書。而著名音樂監製 #佳夫戴維斯 ，更指娜奧美優秀咁完成呢一次艱鉅嘅任務。
新一年新開始，君豪同子華就決定向大家派福利，呢題咁簡單嘅問題相信大家唔會答錯嘅，睇完今集嘅朋友記得22:00去參加活動喇！以後不定時會有電影門票活動，記得留意喇！
至於上星期香港嘅票房龍虎榜，以香港疫情期間星斗小市民生活作故事嘅《窄路微塵》，成為第3位， 張繼聰 同 袁澧林 嘅演出真摯，香港電影值得觀眾再多加支持。第2位則由《無敵貓劍俠：8加1條命》搶佔；至於冠軍就係唔少朋友等到頸長卒之上映嘅《阿凡達：水之道》。
