星爺周星馳早前開IG，即引來唔少網民關注，短時間已吸43萬followers，星爺早前話要請人，即有唔少人交出NFT作品畀星爺過目，而元旦嗰日，星爺喺IG貼出《食神》劇照，並留言問大家新一年有咩願望，通通講出嚟，結果留言變成「星爺許願池」，希望得到本尊回覆!
古巨基早前喺IG分享3歲兒子Kuson講「新年快樂」嘅影片， Kuson表情多多，被爸爸笑佢似「喜劇之王」尹天仇試戲，結果吸引星爺在IG限時動態轉貼影片，更稱「尹天仇有接班人」，基仔代兒子向星爺答謝「I Love You Uncle星爺」，周星馳即回覆錫晒Kuson，古巨基亦有喺「星爺許願池」留言，洩露其影迷身份，笑指兒子Kuson已背好《喜劇之王》外賣仔嗰場對白，非常搞笑。
單立文、張繼聰、胡杏兒、梁諾妍、蔡思貝及莊鍶敏等，有喺「星爺許願池」IG留言，獲得星爺回覆，譬如單立文當年同星爺拍《賭俠》飾演冒牌賭神徒弟「侯賽因」，佢問星爺有冇機會拍《賭俠2》，星爺回應：「你肯嚟華仔實冇問題啦！」而張繼聰希望有機會合作、胡杏兒則叫佢2023年成家立室、蔡思貝希望做星爺條𡃁、莊鍶敏希望跟星爺搵食、梁諾妍約星爺跑步，星爺都逐一回覆：
單立文：想同你拍《賭俠2》⋯⋯ 我可以問吓華仔
星爺：你肯嚟華仔實冇問題啦
張繼聰：希望有機會可以同你合作，學習學習
星爺：客氣客氣，一於咁話
張繼聰：激動，我依家出去喊一陣先
胡杏兒：想你成家立室生個小星星
星爺：條命冇你咁好
梁諾妍：想約你跑步！
星爺：你跑步我踩單車ok?
蔡思貝：我希望做你條𡃁！
星爺：應承你！點報答我先！
蔡思貝：叫你聲大佬！然之後希望緣份可以驅使我好好咁報答你 真的。
莊鍶敏：跟你搵食
星爺：我仲等緊你關照喎