連詩雅Shiga 喺 J2 節目《因為愛情》同大家分享愛情故事既可超越傳統觀念和時間、亦可跨越地域甚至生死。6號晚播出嘅故事主角係Natalie同Simon，出身自營商家庭嘅佢哋， 因為多個巧合同共通點，由「大哥哥與小妹妹」演變成情侶再結為夫婦。原本各自有正職嘅佢哋，因為Natalie 分娩後嘅想法，佢哋決定齊齊辭去原本工作，開創屬於自己嘅環保物料鞋事業；作為老公能夠義無反顧支持老婆想法，當中嘅愛錫實在不言而喻。

兩夫妻凡事親力親為，但係同時就令甜蜜互動變成日夜爭拗

雖然佢哋對生意流程同marketing有一定實戰經驗，不過「由零開始」所花費心力毫不簡單，除咗要好似打工仔一樣返工，放工湊完仔後仲要繼續開Turbo開會、覆Email同趕進度，難怪呢對一向著重儀式感嘅夫婦，由每逢生日、紀念日同大時大節都出外慶祝，變成樓下茶記食早餐都係奢侈：「我哋啱啱嗰個（結婚）周年，有落少少Effort，就係落咗樓下茶餐廳，食咗個快嘅早餐，呢樣都好耐冇做喇，同埋都好耐未試過靜低落嚟唔講公司。」

雖然「拍拖」時間變少，不過相對交談時間其實冇減少，但涉及工作上種種問題，佢哋由從不嗌交變成經常爭執嘅一對，Natalie笑言：「你諗得出嘅嘢都可以拗到，以前係冇拗撬到佢會擔心點解冇交嗌嘅。」由「零拗撬」到「乜都拗」，Simon直認難受，除咗藉Natalie愛錫主動認低威化解危機，自己亦開始慢慢消化接受：「我當初有誤會到係咪感情出現問題，但後來諗通咗係對事 唔係對人。愛情係可以共患難，需要包容，同埋要用努力嘅，唔係有個感覺愛就愛喇， 因為其實感覺係好容易消失，所以真係要好努力地愛一個人。」 

節目中，主持Shiga亦透露父母原來曾因經營生意不時產生拗撬，不過最終卻未能化解危機離婚收場，佢話：「我爸媽都係創業，佢哋永遠因為有一方唔想嗌交同磨擦就去啞忍，但原來呢個啞忍係會慢慢累積，去到有一日就會爆煲。」佢又坦言十分敬佩Simon夫婦：「(佢哋決定一齊做生意)係一個好勇敢嘅決定，同埋對自己嘅感情關係好有信心。」

《因為愛情》 星期一至五晚 22:30 J2

30歲前港姐伍樂怡（Kelly）入行以來演出過不少劇集，佢日前喺社交平台透露自己已唔再從事幕前工作，未來將擺更多時間喺自家生意，佢感謝fans一直支持，以後佢亦喺社交平台不時分享自己近況。

伍樂怡突然宣佈退出娛樂圈，又指自己係想專心做生意，同時佢唔做幕前，做事比較隨心所欲、自由去做自己嘢，同埋抽時間去旅行，更多時間與機會同朋友聚吓，伍樂怡認為呢個先係佢比較嚮往嘅生活。目前佢享受着每日生活嘅忙碌，開心地努力拼搏，想方法做好自己嘅生意。

查實伍樂怡去年受訪時曾透露因要幫手打理家族生意，未必兼顧到演藝工作，伍樂怡生於富裕家庭，父親及大哥經營內衣生意，喺內地開設多間大型連鎖店，每年營業額高達500萬美金，伍樂怡喺加拿大出世及長大，佢於2016年回流香港，翌年參選港姐而入行，伍樂怡近年創立滑水衣品牌，又跟哥哥合資Bagel網店，伍樂怡前年被爆與經營家族生意嘅富二代Fred拍拖。 

伍樂怡曾與鄺潔楹及魏韵芝一齊拍攝旅遊節目《3日2夜》，被網民封係「仙氣女神」，伍樂怡亦曾參演不少劇集包括《星空下的仁醫》、《青春不要臉》、《金宵大廈2》等，佢喺《超能使者》嘅「阿七」等，而佢喺《超能使者》飾演「阿七」成日撞板，加上氣質出眾，令觀眾留下深刻印象！