陳奕迅休息2日後，進入第21場演唱會，Eason喺Encore環節，揀咗顧嘉煇嘅《畫出彩虹》，向香港音樂巨匠致敬，唱畢佢只係講「明就明」，用手勢作出敬禮，獲得全場掌聲及歡呼聲，繼而Eason再唱出《讓我留在你身邊》，希望呢首歌畀大家力量，觀眾即High爆大叫，叫聲震裂紅館。
Eason呢晚依然狀態大勇，歌迷反應非常熱烈，令Eason非常興奮，佢喺Talk位大派bonus，不單止唱咗幾句《孤勇者》，仲唱埋《超人的主題曲》，令觀眾開心到飛起、瘋狂大叫，又不停想同Eason對話。
Eason忍唔住話呢晚好似身在街市：「好亂呀!好嘈呀！好似街市，今晚觀眾咩事，哈哈……」有觀眾大叫Encore，Eason笑問：「我未唱完喎就Encore？新玩法嚟嘅，大家好厭，一定出番嚟，不如唔使落，未唱完End咗先，人真係好特別，人真係咩都諗到，我諗唔到嗰啲你哋都諗到。」
在場觀眾有人叫「肥陳」同「孤勇者」，Eason反一反眼講有排經過草地 ，有小朋友玩飛碟，見到Eason經過，突然大叫「孤勇者」，Eason笑言：「做咗27年，陳奕迅都唔識好失敗，我明嘅，同我一齊長大嘅，聽超人迪加都已經20年前，而家嗰啲小朋友都廿幾歲。」然後Eason突然唱幾句超人的主題曲，不停做打怪獸動作，讓觀眾勁開心。
接著Eason反問觀眾，究竟知不知隻歌真名係叫《超人的主題曲》:「唔係叫超人『迪加』呀，謝霆鋒都唱過一隻超人『帝拿』，佢係我後輩，唔好因為佢好cool唔講嘢，以為佢係我長輩，陳冠希都唱過，佢係超人『佳亞』！」