還原神之食｜重現經典影視動畫美食 J2晚晚教你貼士神還原

J2 繼早前播出嘅《不能只有我看到的便利店追女神食譜》、《即刻食好西》，同主打邪惡美食嘅《開火》之後，星期一起又會推出全新飲食節目《還原神之食》，名廚 祈積奇 同三位睇得、食得但唔知煮唔煮得嘅J2ers 何泳芍  胡敏芝  同 陳欣茵 擔任助廚，嘗試以最簡單快捷但又專業嘅方法，還原無綫經典劇集、電影或者動漫中出現過嘅「神級美食」。

當中包括有《美味天王》、《食為奴》、《情迷黑森林》、 《食㦸之靈》、《魔女宅急便》等，實行盡力將大眾以為「遙不可及嘅神級美食」帶到現實世界。

而頭兩集獲「神還原」嘅經典劇集名菜，就有嚟自1997年台慶劇《美味天王》嘅菜式，包括法國名菜「千層酥皮烤魚」同「極品鵝肝醬烤鴨」，當中較為特別嘅，係原來「千層酥皮烤魚」呢道菜大有來頭，屬法國頂級名廚研製出來的創意菜式，祈積奇喺節目中除咗會還原呢道法國經典名菜，仲會拆解「原著」同「美味天王」中的差別。

節目又會分享西餐冷知識，好似西餐味道基調三重奏(Magic Trio)，亦會示範點將新鮮鴨肝炮製成美味可口嘅鴨肝醬，雖然過程需時三日咁耐，不過步驟就一啲都唔複雜， 絕對值得嘗試。

而首兩集登場嘅「美女助廚」Honey同欣茵就全程「食多過做」，當中欣茵仲完全唔顧儀態大啖品嚐，被Honey踢爆拍完節目後增磅唔少。欣茵受訪時仲話為咗拍攝節目，足足肥咗三公斤：「因為咁啱我上一個都係飲食節目， 主要係每日拍攝我都食足六、七餐，仲要食埋Crew Meal，唔食好似唔夠飽咁，個個工作 人員都笑我係黑洞。」

Honey亦指自己要忍口先可以逃過增磅命運：「我直頭克制到淨係食佢煮嘅嘢食，平時工作人員放飯我就完全唔食。」 

除咗「還原神美食」過程，節目亦包含其他唔同元素，好似去街市拜師學揀魚同劏魚，當中劏魚過程更係相當搞笑，皆因平時好似「零弱點」嘅Honey，去到劏魚一刻就變返「弱質女子」，無論係睇欣茵劏魚或者自己落手都嚇至花容失色，Honey受訪時坦言對劏魚確實有陰影，又透露為拍攝《女野人》同《神之食》，已兩度頂硬上，仲話兩次都發生離奇事件：「之前《港女野人》 劏完魚，我發燒發咗成晚，今次喺街市劏完魚，我就覺得暈暈地，可能驚嚇過度。」

《還原神之食》1月9號起 星期一至五晚 20:30 J2