由內地演員秦俊杰、梁潔、邢菲、林雨申領銜主演嘅武俠劇《飛狐外傳》，將接棒劇集《輕∙功》播出，其他演員陣容包括何潤東、海鈴、葉項明、黃夢瑩、劉瑜峰、赫子銘等。
該劇改編自金庸同名小說《飛狐外傳》，是另一經典鉅著《雪山飛狐》前傳，劇情講述胡斐（秦俊杰 飾）一直視武林第一高手苗人鳳（林雨申 飾）為殺父仇人，在復仇路上先後遇上惡霸鳳天南（黑子 飾）女兒兼天山派女俠袁紫衣（梁潔 飾），仲有毒手藥王弟子程靈素（邢菲 飾），更譜出淒美愛情故事。
早前《飛狐》喺內地播出後掀起熱討，其中「#飛狐外傳#」微博話題閱讀量累計高達5.3億。值得留意嘅係，無綫電視1985年版本嘅《雪山飛狐》當中，飾演胡斐嘅呂良偉，今次亦有客串飛馬鏢局總鏢頭馬行空一角，相當有紀念價值。
除咗劇情冋演員陣容吸引，主題曲方面亦別具心思，無綫專誠邀請當年《雪山飛狐》主題曲原唱者之一呂方，夥拍新生代歌手譚嘉儀翻唱同名主題曲《雪山飛狐》，更獲網民大讚高質。
《飛狐外傳》導演連奕名曾為多部內地電影擔任武術指導，劇集自然不乏精彩動作場面。其中一人分飾「胡斐」同其父「胡一刀」兩角嘅秦俊杰，表示對開場胡一刀同苗人鳳嘅懸崖對戰最為深刻，佢話：「那場戲是我覺得最狂野，因為我們許多耍刀動作。厚重感和力量感都更強，加上為了研究胡家刀法，我們套了很多南刀招式和抹刀法。」
首次演出金庸作品嘅秦俊杰又話，因為擔心辜負「金庸迷」期望而倍感壓力，所以事前做足功課：「金庸在全中國有很多書粉，我怕把這部著作給毀了。」同樣係首演金庸作品嘅何潤東，就罕有扮演大反派，造型方面亦突破以往青靚白淨形象，戴耳環兼留「二撇雞」， 邪氣十足。何潤東受訪時，笑稱希望觀眾可以睇到更人性化嘅「新版田歸農」。
至於人稱「甜劇女王」嘅梁潔就飾演武功高強嘅袁紫衣，對於甚少武打經驗嘅佢嚟講確實頗具挑戰性，所以開拍前專誠向專業武指進行長時間特訓，包括學刀法、八卦掌同鞭等等。 梁潔認為大家互相配合最重要：「不論我一個人、或是我和胡斐兩個人跟很多人打，稍有不注意，對方的刀槍可能就會傷到你，所以不僅要打得漂亮，還要注意敵人的刀槍。」
佢仲坦言一開始拍打戲時動作唔夠自如，仲多次幾乎誤傷拍檔秦俊杰，秦俊杰就笑言：「總覺得自己要被她捅到的感覺。」
《飛狐外傳》今晚起 星期一至五晚 21:30 翡翠台