陳奕迅(Eason)繼《人啊人》之後，推出新歌《盲婚啞嫁》並邀請曾合作嘅女主角蔡思韵一齊拍新歌MV，新歌更有一個長達15分鐘嘅劇場版，由Eason、蔡思韵、谷祖琳及吳肇軒等演出一個穿越時空嘅感人微電影 。
《盲婚啞嫁》歌曲劇場版講述Eason係一位攝影師，太太離世後，點樣走出傷痛陰霾嘅故事。歌詞內容意思係指人生如戲，劇本前世今生已定，只能順著劇本走下去，人生就好似「盲婚啞嫁」一樣，開始時大家唔認識彼此，莫講夫妻、父母兄弟姐妹都係出生前一早已揀定人選，當中是喜是悲，控制喺自己呢位主角嘅心態。一切擁有過、失去過，兜兜轉轉間，有緣又會再重聚。
Eason 再次與蔡思韵合作，佢當然十分開心，發覺蔡思韵長大咗，做戲更自然及有味道，「因為之前合作過，所以冇陌生感覺，覺得幾好呀真係……今次人人都做得好好，得我一個演得唔夠好囉。」
MV 中見到Eason 又喊又笑，非常投入兼演出戲味，Eason指係剪接剪得好：「導演好啦，(你對住張空床，同攝影機喊晒，滴晒真眼淚喎 ) 係呀，真係滴晒真眼淚，拍攝場地其實好多人，可能個景set得好靚，好懷舊，幫到好大忙，係個景入面，咪自己走埋一角，諗吓如果一個咁開心，咁樂觀伴侶離開自己會點，諗諗吓，叫我埋位，眼淚就自然咁流咗落嚟。不過講演技，我真係仲有好多野要學，仲有好大進步空間。」
呢次MV更有一個15分鐘劇場版，似足微電影，稍後會喺網上發佈畀大家觀看，Eason表示微電影都係導演構思，反正拍一個故事，不如就拍多一個劇場版，所以拍咗兩日，但係做得好開心，亦有滿足感。
