李幸倪（Gin）宣佈加盟英皇娛樂，立即發佈加盟新公司後首支派台作品《Dum Dum》，Gin Lee首次挑戰跳唱歌，更親自搵出道12年來從未合作過嘅黃偉文（Wyman）操刀填詞，Gin Lee坦言期待咗呢一個機會至少10年！
Gin Lee對歌曲抱有好多期望，因為呢次重新出發，有一個新嘅機會重整自己，想要好好把握呢個機會，Gin Lee表示：「今次最想achive嘅嘢係『突破』，同埋要俾大家煥然一新嘅感覺。向住呢個大方向搵歌，聽咗好多唔同嘅歌，自己都幾肯定係想要一首快歌作為第一plug。」
《Dum Dum》歌詞方面，亦講述一個人重新開始，想要成為一個更好嘅自己，令到自己停滯不前，最大嘅敵人就係自己，Gin Lee認為最大原因係取決於心態，點樣調整每一次遇到嘅每一個decision，點去克服最大嘅一個challenge。 
Gin Lee今次邀得Wyman操刀填詞，透露出道以來一直冇機會同Wyman合作，呢次第一時間親自邀請對方，Gin Lee相當開心，足足期待咗呢一個機會至少十年，Gin Lee回想一開始戰戰兢兢咁發短訊畀Wyman，希望有機會同Wyman合作，而Wyman十分sweet地回覆「我都好appreciate你一有機會就即刻搵我」。
Gin Lee立即告訴Wyman新歌嘅曲風及想表達嘅內容，佢記得入錄音室唱嘅時候，心入面真係好感激Wyman，「真係覺得，搵佢真係啱啦！返到屋企我都忍唔住send個voice message話畀佢聽，『真係好多謝你！真係填得非常非常之好』」。
二人短訊期間更發生一件小趣事，Gin Lee謂：「咁多年嚟，我同Wyman嘅溝通，呢十年可能都係一、兩次。我轉咗新電話後，第一次message佢，我用文字，佢send語音，傾到咁上下，佢send咗一個message都幾搞笑，佢話：『Gin呀，你介唔介意send個語音畀我呀？我想make sure真係你。因為我冇呢個電話號碼……』哈哈，佢驚其他人扮我，我就笑咗出嚟，我話：『係我呀係我呀，放心放心。』哈哈。」
Gin Lee今次拍MV以四個造型示人，佢最喜歡cool爆嘅黑西裝「Hunter Gin」，「首先睇吓我對con先，勁淺色，好似變咗第二個人；頭髮都經過好多次處理，漂咗染咗四、五次，坐咗幾十個鐘先有呢個效果。我而家呢個造型係MV入面好主要嘅character，我好鍾意呢個character，係『Hunter Gin』，佢會消滅所有唔好嘅我、唔同嘅Gin，令到我可以重生，我可以變成一個更好嘅自己。」
由於呢首係跳唱歌曲，Gin每日均花三至四小時練舞，希望掌握每個動作細節，「到而家係有信心去做每一個動作，成個過程我會覺得係好唔容易，但係我好enjoy，雖然我好鍾意跳舞，但唔係由細去學，所以我要將勤補拙，好俾心機，盡量係爭取時間練好佢。」向來追求盡善美的Gin除咗跳舞，就連身形都特意加操體能，要以最佳姿態示人，Gin自爆起初做Gym心跳到140左右便會感到頭暈，差唔多每次都做到暈，後來慢慢適應，自覺身體開始強壯，後來就算做激烈運動，心跳到180多都冇問題。