由馬德鐘及李佳芯主演嘅新劇《有種好男人》，噚晚播出嗰集講到Charlie（李佳芯飾）與楊日正（馬德鐘飾）戀情轉入直路之際，物流大王千金霍嘉莉Emma（伍樂怡飾）忽然介入，令「Char日」CP出現暗湧！
事緣遭Emma點名充當貼身保鑣嘅日正，於Emma遭兇徒攔車意圖綁架意外撞傷額頭後、以一招「公主抱」送Emma入院接受治療，Charlie見兩人舉動親暱即大發醋意，面對育有17歲兒子嘅「女神級」單親媽媽Charlie同年輕貌美「氣質系富家女」Emma，到底日正點抉擇？ 
劇中「女神大戰」夠晒引人入勝，現實生活中80後女神李佳芯與90後女神伍樂怡比拼亦相當精彩。李佳芯一早被公認為「女神」級代表人物，演技一直大獲好評，2018年憑《BB來了》勇奪視后，近期又獲封「收視靈藥」，神級程度可想而知，而後起之秀伍樂怡來頭不惹少，2017年港姐五強人馬，當年獲封「民選港姐冠軍」，更因與「小龍女」李若彤撞樣，被稱「仙氣李若彤」，之前伍樂怡喺TVB劇《青春不要臉》，「神遇原」李若彤當年小龍女造型，人氣急升。
劇中飾演家境富裕嘅Emma，現實中嘅伍樂怡其家族經營內衣生意，身家同樣豐厚，對於被網民拎佢跟李佳芯比較，伍樂怡笑言：「本身好鍾意睇Ali嘅戲，佢都係我女神。」
李佳芯喺劇中連環「心動式」造型惹起熱討，飾演日正姑姐楊飛雲嘅陳自瑤（Yoyo）也獲網民大讚外貌及演技同樣出色，指Yoyo角色討好、做八婆仔幾正，直至噚晚，飛雲終於邂逅同樣被其前度郎子偉（姚亦澧飾）騙財嘅田中直男（黎學勤飾），後者對性格率直樂觀嘅飛雲「心心眼」。
對於獲網民大讚演得入型入格兼Keep得好，甚少扮演「十三點」嘅Yoyo，自言好喜歡呢個角色：「好開心大家鍾意飛雲，因為呢類角色一演得過火就會乞人憎，所以真係要拿捏得好好。」至於保養心得？現年41歲嘅Yoyo認為心態最緊要：「雖然我有番咁上下年紀，但都仲覺得自己心態上好後生同開心，呢兩樣都係保養好緊要嘅秘訣。」
《有種好男人》逢周一至周五晚8點半翡翠台播映